現年55歲的游炳佳，年輕時曾任職船員，與妻子育有一子一女，本有一個幸福家庭，可是其後卻因誤交損友，與毒品為伍，七年前更因犯事鋃鐺入獄，令人生留下一個污點。「都係自己唔爭氣，嗰時會群埋呢啲人，結果搞到要坐監，老婆留低封信就咁走咗，兩個仔女就要入兒童院住。一日都係自己唔好，搞到今時今日咁，我真係好後悔。」
排期等切除膽石
佳叔於去年底出獄，無家可歸，前路茫茫，更一度露宿街頭，其後獲社會服務機構幫助，申請公屋，早前終獲編配一個公屋單位，得以有容身之所，可是他出獄後身無長物，甚為煩惱。
「我身體好差，幾年前喺監度患咗膽石，要排期等做切除手術，𠵱家仲未輪到。呢幾年定期覆診，試過好幾次嘔到成地血，要入急症室，仲要留院。有時好痛嗰陣，就要睇急症，四月就去咗兩次。」
佳叔獲編配公屋後，因健康欠佳，無法工作，依靠每月2,600多元綜援金過活，根本無能力添置家具、電器，香港善導會九龍東社會服務中心，將佳叔個案轉介蘋果日報慈善基金跟進。
佳叔對記者表示，現時使用的床、櫃及無腳梳化，都是在街上撿拾得來，「人哋唔要，我見仲用得，就執嚟用；雪櫃、洗衣機、煤氣煮食爐同熱水爐我就冇能力買，如果有雪櫃同煮食爐，就可以儲起啲嘢，再煮嚟食，唔使𠵱家日日食餅乾。」佳叔期盼說。
捐款編號：C2052
蘋果投訴熱線：29290000
社會服務熱線：29908288
傳真：23702192
電郵：[email protected]