中國銀行（3988）上市，捧場客人人有錢賺，而認購中行被凍結的資金回流市場，照計可以撐起大市一段時間，希望大市唔會好似早排悶得咁交關，大家可以喺股市搵番啲唞暑費。
經紀陳上周六講過駿新（091），隻股轉型返大陸搞燃氣，股價有異動。噚日打波時佢又講到中油潔能（260），公司轉型搞天然氣有一段時間，據講成績開始見得人，稍後會加強搞投資者推介會，估計會有利股份交投。
中油潔能同其他大陸燃氣股有啲唔同，佢唔係搞接駁上樓，而係搞壓縮天然氣同埋液化石油氣加氣站，客戶主要來自公共汽車集團，所以生意相當穩定，而投資成本亦唔算高。中油潔能家陣在大陸設有33個加氣站，但目標係提升至150個，睇落相當進取。隻股喺3月份先至按每股0.52元配股集資5000萬元，所以資金應該唔係問題。
中油潔能早前曾炒上至0.75元，上周五收0.63元，冇起跌。
慕容小初