上禮拜中段，美股散過一陣，全周埋單則仍有36點進賬。港股亦係有驚無險，全周埋單有17點進賬。美國加息壓力減低，雖然唔代表全世界股市會有大運行，但小康局面可望出現，唔使一路揸股票一路做鵪鶉。
中行（3988）上周四出爐，星洲股市喺做輪方面，又贏咗本港一仗，即日已有中行C輪與P輪各3隻掛牌，交投算活躍。人家做外圍，香港依例要等，點解辦事成日要鐵板一塊？上鋪，建行（939）去年10月登場，又係坡佬嗰便即刻有輪上場先飲頭啖湯。
中銀C輪3641：中行連威兩日，周五收3.475元，較招股價高出18%。雖然話PE高過其他國內銀行股好多，但大戶細戶鍾意，大手大手索貨，中行有得睇。如果有星洲關係隔山買中行C輪，可以記低冧把：BOCHW1、BOCHW2、BOCHW5，全部12月初夠鐘，溢價5.6%至10.1%，槓桿率7.4至9.2倍（最抵係BOCHW5）。
喺香港買唔到中行C輪，買中銀C輪可也，主角3641，博中行再升帶起中銀（2388），中銀升帶起3641。
交行C輪4901：中行睇好，交行（3328）都唔會衰得去邊，買C輪4901。隻輪11月8日到期，輪價66仙，溢價2.9%，槓桿率7.4倍（有效6.1倍），引伸波幅22.8%。呢件數據，靚過好多其他交行C輪，最弊係交投太疏。
章盛