《火舞黃沙》的宋東陽，現實裏的黃德斌，都是硬漢子，眉飛色舞大談萬事得RX-8，仍然很權威。不過，對於女人，一身肌肉的男人駕駛跑車，特別有安全感，試想，撩鬥車的死飛仔看到這個男人和RX-8，還敢來嗎？對，跑車和黃德斌一樣，不用跑，氣勢也贏了一半，輸人唔輸陣，嚇吓你都好。
記者：黃婉冰
攝影：何家亮
「RX-8無我想像中咁勁Power，但對我來講已經夠玩，佢好易操控，我第一次揸都好快上手。」
黃德斌試萬事得RX-8，像兩個不同世界的肌肉型男人搏鬥，坐在乘客席，很興奮。由將軍澳工業邨入大坳門，黃德斌很認真的試，不是太激，但每個彎都有不同線位，一輪不同速度攻彎後，他笑笑：「架車好有跑味，但Power無想像中咁勁，對我來講已經夠玩，操控好容易，我平時開半自動波車，今次試呢架棍波都好快就上手，操控唔係難喎。其實以呢個c.c.嚟講佢都算OK。呢架車推出時我都有諗過買，呢款係我試過MX-5之外、最鍾意的萬事得跑車，當時我問過朋友，佢話呢架車再改少少會仲好，但係我又唔鍾意改車，所以後來先無再考慮。」
「我最欣賞佢嘅車門設計，雙門得來又唔會好房車，但如果有硬頂開篷或天窗，我諗我會更鍾意。」
一點後悔，後悔RX-8車廂細，黃德斌神高神大，會否有點兒屈質呢？「個車廂不至於頂頭，之前試過LOTUS，侷促好多，如果加個天窗或開篷，我會更加鍾意，但一定要硬頂開篷，咁先可保留車頂外形。」車廂「扒時」，設備又有幾多分？「車廂設備做得幾靚，好似DVD咁就最啱我，平時拍戲要等幾場戲，等埋位時可以睇套戲打發時間。我唔鍾意飲品周圍碌，佢好在杯架多，多得嚟又唔會全部露晒出來，簡單整齊。仲有幾鍾意佢張櫈，好好坐，個色襯得靚。至於外形，佢雙門對開唔似房車，但方便上落，唔錯。」
「得個跑樣又唔夠Power，的士都快過你咪盞俾人笑，所以架車個樣唔使好跑，最緊要都係Performance夠勁。」
這個論點我不同意，黃德斌你要明白，女人坐車的想法不同，我們是要安全感。快是快過別人，威也要給人看，這就是Performance。黃德斌擁有的AlfaRomeo156，行10條街都未必見到1部，就知很另類。「我鍾意速度感，但唔鍾意跑街，玩跑車應該係落場，但在街上，其他人唔係同你賽車，好易出意外。我買車最緊要係Performance，得個樣夠跑但無Power，的士仲快過你咪盞俾人笑，所以性能行先，個樣唔使太跑，亦唔使300、400匹，夠玩就得，RX-8嘅Power唔係好勁，但對我嚟講已經足夠。」
MazdaRX-8規格
引擎：654c.c.×2雙轉子引擎
馬力：250ps/8,500rpm
扭力：22.0kgm/5,500rpm
傳動：6前速手波
售價：$369,000
車輛提供：偉昌汽車（23030328）