記協今年嘅酒會玩得相當高興，喺上個禮拜五搞到11點幾至曲終人散，其中貪玩嘅醫管局主席胡定旭仲同同事大唱粵曲，將帝女花嘅曲填咗英文詞，又有成班醫管局嘅中樂團幫佢伴奏，高層人馬馮康拉二胡，認真高興。
肥胡嗰晚同醫管局負責新界東醫院聯網臨床服務總監董秀英出場，唱粵劇名曲帝女花，上台之前仲話驚唔記得歌詞，要帶定張貓紙。不過，佢愈唱愈高興，董秀英醫生歌藝直情有專業演出嘅水準，據佢醫學院同班同醫管局高層張偉麟話，董醫生無論唱男聲同女聲都唱得好好㗎。
另外，胡定旭唱完帝女花之後，仲唱咗一小段由佢自己填詞嘅英文帝女花，引得哄堂大笑，佢話以前讀書都做英文粵劇，今次只係唱幾句啫。佢哋呢場醫管局中樂團加主席加高層嘅表演，幫記協籌咗唔少錢，其中馬會主席夏佳理講笑話「可唔可以捐五萬叫胡定旭唔好唱？」佢當然係講笑啦，最後佢都捐咗五萬蚊。
傳真︰2623-9278
電郵︰[email protected]