唔少香港機迷都鍾情《DQ》、《Mario》呢類日系風格，但其實全球玩家嘅口味已經變緊，起碼老外早就冇再當佢哋神咁拜。呢幾年響歐美最Hit，首推集暴力與自由於一身嘅《GTA》，最新嗰集由PSP反向移植到PS2，今勻用大電視玩不知幾爽，更毋須再捱玩兩嘢冇電自動熄機呢種慘況！
文：陳福榮
《GTALibertyCityStories》（以下簡稱《LCS》）係暴力名廠Rockstar開發、Take2負責銷售嘅全新PS2作品，取自之前搞到滿城風雨嘅手提機PSP版本，事關Game入面嗰個漏洞令人可以玩到「無料器」，逼SONY係咁Update個Firmware到v2.7先至掂。其實平時真係好少見逆移植呢種情況，不過掛得《GTA》個朵當然會有勁到爆燈嘅叫座力，起碼每集都賣到幾百萬隻，唔講得笑！好多老友之前都Miss咗《LCS》，事關冇PSP之餘，就算有機都俾佢嘅「無限Load狂食電」嚇怕，𠵱家終於可以安安定定咁駁住部電視同HiFi慢慢享受，加上廠方劈價20蚊美金搶市場，難聽啲講句「嚿零水」跌都跌咗啦，想唔豪畀你都唔得！
剷除2大家族勢力
呢隻前傳係發生喺《GTA3》嘅故事舞台LibertyCity，講述主角ToniCipriani因為幫老闆做嘢搞到要着草幾年，之後當佢回歸發現時不我與，昔日夥伴唔少都做咗大佬輩，咁佢惟有重新嚟過默默向上爬。最後非池中物嘅Toni排除異己，兼且解決埋另外2個黑幫家族令老闆獨步天下，成功上位擔任一人之下、萬人之上嘅超級蠱惑仔。
好多人以為《GTA》出過好多集，事實上只有3集正傳，其餘屬移植版及加強版。例如最受歡迎嘅《ViceCity》只係3代外傳，而前年推出、因一個「熱咖啡」程式搞到俾人強制變為成人級嘅《SanAndreas》同樣亦係3代外傳，加埋今次《LCS》又係3代嘅前傳，Rockstar齋靠呢個系列已賣咗超過五千萬隻！
交通工具愈見過癮
話明《GTA》就當然要偷要搶，最緊要有大量車種揸吓咁先夠過癮！《LCS》不但俾你揸豪華房車及搶街邊架爛鬼錢七，就連大貨車垃圾車都照揸可也。《LCS》最吃重當然係型到飛起嘅電單車，坐上去抽頭飛車等動作不在話下，着住件型仔皮褸嚟揸仲成個華Dee咁款，加埋武器種類繁多，機槍榴彈樣樣齊，甚至誇張到有Rambo嗰種單筒火箭炮，真係用嚟打仗都仲得！
正斗壁紙襯主機
值得一提係官網特別設有PSP版壁紙畀機迷下載，鍾意呢隻名作又想用佢嚟襯吓部PSP，直接拎佢張PSP壁紙就搞掂，唔使再搵整相程式修改比例咁煩！日本仔呀，學吓人哋點做嘢啦。（編按：對不起，《櫻大戰1&2》就有齊8位主角PSP壁紙下載。）
PROFILE
對應機種：PS2
遊戲類型：ACT
遊玩人數：1人
開發廠商：Take2/Rockstar
推出日期：6月6日（約港幣$156）
