倒數4日,就係世界盃決賽周大日子,大家諗定點樣過未?手機網絡商各出奇招,早就喺意料之內,但勢估唔到,有網絡商為咗要大家睇得更投入,竟然提出「唔贏唔收錢」呢項服務!筆者個死黨大炮祥就不斷追問,係咪投注咗幾多錢都可以回水咁筍先?筆者即時暗笑兼贈佢一句:「你估人哋開善堂咩?」
記者:尹謹基
勝出先收服務費
究竟「唔贏唔收錢」係乜東東?查實呢條橋係由SmarTone-Vodafone提出嘅!為迎接世盃時刻,佢哋特別開設「世盃投注秘笈」,內容除咗提供賽前分析、即時賽果、賽程預報等例牌嘢之外,仲設有一項名為「貼士速遞」服務。全部64場賽事入面,每場比賽都會Send出1至2條波纜貼士畀用戶,跟唔跟佢買當然有得揀,若然跟佢買又唔中,網絡商話明唔收取服務費,聽落都幾筍!不過啲貼士有幾堅就不得而知,始終波係圓嘅,睇完「貼士速遞」再落注,咪當多一個Choice囉!
各出奇謀搶客
雖然數記呢招夠盞鬼!不過其他網絡商亦唔執輸,一樣大搞噱頭!例如3HK就搵張達明粉墨登場,以棟篤笑方式嚟講波,相信會笑到碌地都唔定。和記仲獨家播放adidas世盃足本電視廣告,有齊碧咸等球星幕後花絮。至於CSL、PCCW同埋Peoples,亦推出勁多世盃猛料,好似CSL就提供「MobileESPN」頻道,包你出夜街都唔驚Miss咗重要比賽片段!