今期主角Richard，40多歲，執業大律師，金牌經紀Peter嘅中學同學，因有危機感，所以多次泡沫爆破都死唔去。
金牌經紀Peter：TradingDesk。
客戶Richard：Peter，上個禮拜鬧到全城風雨嘅「巴士阿叔」，初頭我仲估你就係嗰個巴士阿叔㖭。以你嘅脾氣、性格……。
Peter：Richard，你已經唔係第一個咁問我嘅人，講真，我自己睇完新聞報道講巴士阿叔，都已經預咗所有識得我嘅人，會咁問我。其實我已經收斂咗好多，巴士阿叔係以前嘅我。我哋香港人，以前對住董建華，有邊個「冇壓力」？有邊個冇嘢「未解決」？我好明白巴士阿叔嘅感受。
Richard：我唔係第一個問你咩？哈、哈！不過講真，今日我搵你係想攞你嘅意見，因為我真係唔識睇個市，覺得好似危危乎，我想清倉，揸現金。
兩大指數力撐
Peter：又唔使咁急，呢幾個禮拜我都係睇實個市。最緊要係睇實究竟呢個牛市玩完未。自從「沙士」、波斯灣戰爭之後，全世界所有股市都一齊升，今次已經唔係你第一次打電話畀我問我「牛市玩完未」。記唔記得舊年10月？
Richard：記得，記得。好在我搵過你傾傾，如果唔係今年就賺少咗好多錢。
Peter：咁記唔記得DowTheory？
Richard：講啲指數嗎，記得。
Peter：真係記得？
Richard：你都唔係第一日識我，我數口好就當年唔使抄你功課，唔使讀Law啦，大佬！
Peter：我就係要聽你叫我一聲「大佬」。哈、哈！講番DowTheory，呢個就係當年發明道瓊斯指數嘅人，觀察得到嘅睇轉勢方法。DowTheory嘅神髓，就係睇吓啲大型指數，係唔係一齊轉勢。佢當年就係睇道瓊斯工業同杜瓊斯運輸指數，如果佢哋兩個指數都雙雙轉勢，咁個市就真係轉勢。
Richard：𠵱家都係一樣？啲指數互相確認轉勢？係唔係照樣睇嗰兩個道瓊斯指數？
Peter：𠵱家冇咁興睇道瓊斯指數，同埋唔可以淨係睇美國市場。今次呢個全球升浪，投資香港市場，最好睇實美國嘅標普500指數、英國嘅富時100指數、日本嘅日經平均指數。咁啱得咁蹺，連同恒生指數，四隻指數一齊由高位下跌，下試200日平均線。睇走勢，四隻指數全部下試失敗，全部成功守住200日平均線。即係等如，四隻指數都應該反彈。
Richard：彈幾多先？大佬，幾十點有鬼用咩？
八月前上五毫
Peter：如果牛市真係未完，純粹用Point&Figure嘅古老技術分析，恒指首先上返16750。
Richard：都幾好，咁我應該點買？
Peter：我建議買同恒指一齊郁，不過波幅更加大嘅股票。最好就係買股票嘅認股證。即係，今日我建議你買中移動（941）認股證4451，呢隻輪八月到期，𠵱家做緊兩毫幾三毫，我睇都幾快會上五毫。
Richard：好，就咁做！