《信報》孔少林寫「原是物語」專欄，秉承原復生作風，評論股市投資，十分精警，有時不可不讀。不過孔少林喺六月二日寫06年世界盃之巴西必敗，未免太武斷兼且太過陰謀論，難以令人信服。賭波賭馬如果掛住陰謀論，賭得好唔快樂，而且多數輸；如果外圍莊家、操控集團可以收買朗拿甸奴嘅話，普通人點樣夠佢哋諗呀？人哋搞陰謀，你去拆招，人哋在光，你在黑，點拆呀，輸梗啦。孔少林成日睇年報，講數字，研究生意模式，冇用嘅噃，如果佢相信陰謀論，使乜睇年報啫，拆局咪得囉，拆穿大莊家買貨散貨嘅局，容乜易賺錢。
巴西一九九八年輸畀法國，冇錯令好多球迷失望，但到𠵱家為止，冇證據顯示巴西打假波，亦冇引起國際足協調查是否打假波。詹德隆認為佢自己被欺騙，係佢自己嘅感覺，但唔代表佢一定睇得啱。孔少林從九八年世界盃決賽情況引申到今年巴西必敗，假設賭波集團可以用一千萬收購朗拿甸奴，幻想力過份驚人一啲。一千萬港紙呀？細哨不屑一顧！一千萬鎊呀？細哨可以一年之內搵到，唔會恨。
六月二日，著名足球記者RobHughes發表一篇報道在《國際先驅論壇報》。世界盃開賽之前，佢特登去里約熱內盧採訪，發覺巴西人幾乎家家戶戶已掛上布條、貼紙、宣稱巴西「向第六次進發」、「第六次」就係指巴西第六次贏世界盃。巴西人信心爆棚，認為球隊人才濟濟，即使朗拿甸奴失水準，分分鐘有五個人可以替代佢。七○年世界盃冠軍隊隊員拖土圖對Hughes講：「贏第六次嘅情緒壓力已達荒謬水平，但可轉化為動力。」咁大嘅壓力，會唔會壓垮啲球員呀？巴西球評家認為巴西隊中前場冇得彈，後防令人擔心，卡富（右閘）與卡路斯（左閘）已經年紀大，失去速度，一犯錯，可能致命。足球係圓嘅，巴西會係大熱門，但冇話奉旨必勝，如果輸波出局，就話巴西隊打假波，係懶於足球分析嘅最佳藉口。