新地郭氏三兄弟大家見得多，但佢哋嘅另一半就低調好多。華華前兩日喺港大一個論壇，見到好少露面嘅郭炳江夫人梁潔芹。郭太當日混喺一班聽眾之中，靜靜地由2點幾坐到5點幾，只係間中行開行埋食件餅，一有攝影機喺咗近，佢就會以9秒9速度閃開，華華都差啲走漏眼。
好彩卒之有個空檔，華華即刻走去同郭太打個招呼，郭太只係笑笑話，演講內容幾吸引，跟住好有禮貌咁講咗句「祝福你」，就行開咗喇！
好多人都知郭炳江兩公婆都係虔誠教徒，唔使華華多講，好似郭太咁，一同華華傾完偈，就孖住場內兩位男士，即時喺個論壇一角祈禱，雖則全場都冇同老公排排坐，但郭生一離場，佢亦都即刻走，所以華華覺得，佢應該嚟撐老公，多過捧個論壇。