進入世界盃倒數不足1星期，全城期待之餘，就連足球癡MichaelLau（劉米高）都按捺不住，久休復出推出一套屬於世界盃嘅Figure「QUARRYBAY2006」。雖然系列外形熟口熟面，但勝在花臣多多！而且，純粹係為滿足自己，限量60套。
記者：許維雅 攝影：陳陶鈞
鰂魚涌組隊38成員
劉米高Fans一定知道Crazysmile公仔，但原來佢係劉米高足球隊嘅隊名。繼之前出咗02、04年2個不同波衫版本後，今年為迎合世界盃再次推出一系列Crazysmile公仔。而最搞笑嘅係，劉米高竟然設定呢個Crazysmile嘅世界盃喺鰂魚涌舉行（劉米高喺鰂魚涌住咗10幾年，主場喎！），仲整埋隻鰂魚涌吉祥物，抵死到暈！
當然，劉米高亦有將今年真正入圍世界盃嘅32強波衫，笠在不同表情嘅Crazysmile身上。加埋歷年來劉米高自己覺得最靚嘅4款吉祥物，同一隻無得賣嘅「劉米金盃」Crazysmile，合共推出37款！咦？32+4+1+1唔係38咩？係，但係鰂魚涌嗰隻吉祥物只出Tee而無出Figure，所以少咁隻。
搞鬼搞埋「劉米金盃」
劉米高又再出Crazysmile，表面理由係熱愛足球，實際理由就係驚Fans啲錢無碇使，所以花臣多，要抽齊絕對有難度。今個系列嘅Crazysmile每1盒有2隻，國家隊32隻可以睇定嚟買，但係4隻吉祥物就1盒得1隻，抽中邊隻真係聽天由命。當中每款仲分為黑白同彩色2款，黑白色就唔係吉祥物，背部仲印住個「BAD!」字踩你一腳，而彩色嘅真正吉祥物就當然印住「GOOD!」啦。
除此之外，買國家隊Crazysmile仲有機會喺個盒度搵到金色足球仔1個，抽中就發達喇，可以憑波到劉米高嘅Gallery換「劉米金盃」公仔，全港得100隻，難搞！再難搞啲，嗰100個幸運兒可以參加抽獎攞埋全港唯一24K足金「劉米金盃」返屋企。要儲齊晒咁多款，仲要好好運先得。
骷髏骨做吉祥物
記（記者） 劉（劉米高）
記：停工咗咁耐，今次又出世界盃Crazysmile，係咪因為之前同SOGO合作出世界盃BBFigure撩起條癮？
劉：唔係。我好鍾意睇世界盃，幾個月前已經開始構思，但後來都驚麻煩，諗過放棄。直至2個月前諗起上屆已經因為怕煩無搞，驚下屆自己唔係搞緊Figure想搞都無機會搞，所以咪趁今年的起心肝完成個Project。
記：個吉祥物點解會係骷髏骨嚟呢？
劉：邊有人用啲咁唔吉祥嘅嘢嚟做吉祥物㗎，但係我又覺得幾好笑喎。我唔係鍾意骷髏Print呀！唔關Undercover事㗎！
記：今次呢個Project好似特別多花臣，目的喺邊？
劉：「劉米金盃」嘅構思我想跟足，所以諗到用真金做1隻公仔出嚟，本來想做100隻，但係發覺太貴，所以就變成𠵱家玩大抽獎。其實都諗過用估世界盃冠軍嚟送足金公仔，但係如果個個估巴西我咪死梗？
1個禮拜踢足3場波
記：依你咁講，即係睇好巴西啦？
劉：贏硬！無得輸！朗拿甸奴簡直無敵呀！神射手？好難喎，無咗依度奧！巴西嗰個公仔我特登整靚啲，係偏心巴西㗎喇！
記：咁緊張世界盃，呢個月點過？
劉：之前諗過呢個月咩都唔做齋睇波，我仲同Gallery個業主拗咗幾個禮拜先可以喺呢度裝咗隻收有線嘅鑊，到時一定會約埋大班朋友上嚟睇波。會唔會場場睇晒？想！不過好難，今年有太多隊波唔識喇。
記：你都鍾意踢波嘅咩？係咪最鍾意打前鋒？
劉：Keep住1個禮拜踢3場㗎！不過我唔係鍾意打前鋒，而係，我根本就係前鋒！踢得波多，精神都好啲㗎！
離譜！未出街eBay炒高3倍！
以劉米高在Figure界的江湖地位，手製Figure曾經俾人炒到過萬。最離譜係最近佢同SOGO合作的6吋世界盃BB，官方預定在6月9日世盃開幕日，開始在SOGO購物滿$300另加$300換購，點知啲炒家直情用雜誌圖片鋪上eBay，已經開出US$479.99（約HK$3,744，貴足3倍）的一口價。講真，呢批BB只係劉米高昔日Gardener當中的一款換上國旗版，咁都有價有市，真係……服！
SOGO查詢：28338338
死硬Fan：4隻吉祥物有潛力！
炒賣劉米高玩具嘅舖頭唔多，炒家多數放貨喺eBay、Yahoo!度賣，因為外地如美國、日本嘅升值能力仲高。而喺先達開舖賣玩具嘅Henry就係劉米高死硬派Fan屎，所以先會喺舖頭炒賣劉米高作品。問到佢點睇今次呢套Crazysmile，佢就話初初睇到廣告淨係得英格蘭1隻都有啲失望，好多Fans都投訴無突破。但係𠵱家知道有咁多嘢抽又唔同講法，照睇都係4隻吉祥物最有潛力炒得高價。
bicoToyz（64767979）
地址：旺角先達廣場2樓S31號舖
街頭反應麻麻
售賣點：
地址：鰂魚涌七姊妹道204號駱氏工業大廈11樓
查詢：28113111
