過咗端午節公眾假期接近3日，終於收到最新一期《AutoEXPRESS》，齋睇封面，最吸引我注意係新款寶馬Z4MCoupe。自從年初走到西班牙實地測試過Z4M開篷版之後，佢嗰台3.2公升直6偈所帶來嘅343匹瘋狂加速力，至今仲好記得，所以我可以想像到就算變成硬頂Coupe版，性能表現一啲都無變。最欣賞係個Look，望落去好有跑車Feel，車尾造型仲有啲似同廠嘅6系㖭！
開篷小車大激鬥
再將雜誌往後揭，發現了1場開篷小車大激鬥，主角是不日在港發售的歐寶Tigra1.4和三菱ColtCZC；一如以往，車評人以外形、車廂跟性能表現3方面作比較，值得留意係司機上落Tigra1.4時，好容易會撞到A柱，但電摺硬頂就幾好用，ColtCZC就風擋設計好，可為乘客阻擋亂流，但尾窗設計則跟外觀有點格格不入。最後結果係點？打成平手囉！
記者：鄭達基