尖沙嘴山林道由70年代開始，已經係日本料理店的集中地，直到𠵱家，唔少舖頭閒閒哋都已經開咗十幾年，30多年的舊舖屹立不倒，坐隱老大哥的位置。上個月有新舖加入戰團，「御」以不少新派日菜打響頭炮，其他舊舖亦唔敢怠慢，趁轉季又出新菜，山林道烽煙四起，最後咪益晒我哋呢班為食一族?!
記者︰劉昱蘭 攝影︰陳陶鈞 Model︰Lin（Salvador）
鮮奶海鮮鍋 $350/2人
用西式手法煮鮮奶湯底，啖湯真係好花心機，分別要煮好菜湯同肉湯兩個湯膽，兩者混和埋又要煲吓，最後加牛奶加調味略煮。其實唔要海鮮的話可以轉配牛肉或雞肉鍋，但試過清清哋嘅鮮奶配海鮮最夾。
御龍卷$88
以西式芝士，包住天婦羅大身虎蝦，蝦經炸過唔會乾身，又有芝士的香口，面頭加上紫菜粉同蟹子，一條龍的賣相氣勢贏晒！
海膽飯$88（6月中推出）
以西菜羅文葉，代替日式傳統的青瓜、紫菜，捲住貴價甜身的馬糞海膽嚟食，更能帶出海膽的鮮味，同時帶出海膽爽口感。
御 林師傅做菜講即興
滿街都係Fusion餐廳，你就知道香港人食嘢幾嘴刁幾貪心，今次御日本料理以西式日菜殺入山林道，大廚林師傅最鍾意喺廚房閉關，縱使對住啲食慣食熟嘅材料，靈感一到就即落手整畀熟客試，最鍾意呢種即時嘅刺激感咁話。以西菜的煮食手法，加添日菜靚靚嘅衣裳，呢種西方同日本撞出嚟嘅鮮味好獨家兼且多元化，必試！
食客幾句
林生︰「味道都幾好，份量再大啲就更好。」
Grace︰「水準都OK，魚生飯幾鮮幾好食。」
御日本料理（23020220）
地址︰山林道4-4A恒貿商業中心1樓
大盛 鍾情夏日混醬
冬天要食鍋物取暖，夏天就梗係要酸咪咪開胃菜啦！所以大廚輝哥都集中火力，研究沙律醬的無限可能，用嚟蘸上壽司伴住食，或者燒物時塗上一層醬，同樣惹味醒胃。輝哥主要以生果、蔬菜、酒、料頭（如葱、蒜等）、芝士、香草或蛋配沙律醬，有無一條配搭食材方程式？「好難講嘅喎，憑感覺啦！」
燒炸蝦反卷 $40
輝哥將燒飯糰的方法用落反卷度，要點大量的芒果芝士醬先好食，炸反卷外層變成飯焦咁，餡內有炸蝦、蟹柳、青瓜絲，口感清爽。
和風黃金醬焗象拔蚌仔$38
食清酒或辣酒煮象拔蚌仔就食得多，燒嚟食就係第一次，配料頭沙律醬嚟燒好香口，同酒煮的清新味好唔同。
大盛壽司$45
呢個就無醬可點，因為拖羅茸、海膽、甜蝦、三文魚子呢4樣配搭已夠晒鮮味，最突出係個海膽同拖羅的鮮味，加埋甜蝦同三文魚子的質感，一啖四味夠特色。
遊客都識食
(左)新加坡遊客EK︰「好味過新加坡嘅日本料理，有特色啲。」
(中)Kenny︰「呢條壽司好味，尤其係出名特長壽司，正。」
(右)Christine︰「我鍾意呢度選擇夠多，睇得出有花心思整菜式。」
大盛日本料理（23021888）
地址︰山林道22-28號瓊林閣8-9號舖地下
輝哥耍家5醬
a.蛋白沙律醬
蛋白其實無味，最主要係取其彈彈吓嘅口感，配肉類如沙拉雞翼一流。
b.茄汁Tabasco沙律醬
呢個醬係肥牛香蕉小食專用，好少辣味，靠茄汁帶起牛肉鮮味。
c.蔬菜沙律醬
蔬菜包括菠菜碎、青椒、甘笋等，最啱配海鮮，又有蔬菜碎嘅咬感。
d.料頭沙律醬
有蒜有洋葱又有少少酒，最好燒煮時用，因為燒過之後先可以更入味。
e.芒果芝士沙律醬
芝士香口，芒果可即食，點壽司食就最Perfect。
新大壽 Suzuki師傅 堅持6日飛機貨
舖頭35年以來，由大壽到新大壽，日本師傅Suzuki都無離開過山林道，以正宗的日本料理，見證山林道不少的日本餐廳由開舖到結業，又睇住一班熟客由細食到大，有啲仲做埋醫生、律師，都要嚟搵番Suzuki嘅正宗日本味道。熟客當中不乏名人，好似唯靈、徐克、爾冬陞、王傑等都不時光顧，成為山林道的名人飯堂。日本菜最緊要係不時不食，所以新大壽一個星期6日飛機貨，務求客人食到最時令最靚嘅魚生同食材。
金目鯛（上）（$150/客）、飛魚（下）（$130/客）呢類少見的時令貴價魚生，係傳統日式舖頭先食得到，攝影當日新鮮到埗。
海膽梳乎喱鍋$100
原來傳統的日本師傅，都鍾意用蛋白配海鮮，因有蛋白的菜賣相靚仔，又可以去腥味。以蛋白鋪面做成梳乎喱嘅樣真係幾得意，個湯有海膽、蝦同蘑菇仔，好鮮甜喎！
蒸蠔燉蛋$88
Suzuki做傳統日式料理，新菜式唔係成日有，呢個蒸蠔係專為今次採訪新研製。以珍珠蠔碎、海膽碎、雞蛋、菠菜碎燉成，味道清清哋，突出海膽同蠔的鮮味，好味！
新大壽日本料理店（23682711）
地址︰山林道收成樓1樓
北酒場 以酒佐菜 教埋你點飲
以北酒場起朵，酒類當然唔失禮，淨係清酒都起碼有30幾款，遲啲計劃如果客人叫套餐，就會幫埋佢搵一隻絕配嘅酒，仲會教你點歎。除咗酒之外，呢度嘅壽司、小食都落足心機畀足本，今期主打以Size做主力，大嘅多料，小嘅精緻，經理仲幫大家襯埋支清酒，快啲過嚟學嘢啦喂！
北酒場卷$120
Size比普遍反卷大3倍，一卷包晒8種材料，有天婦羅、鰻魚、蟹子、甜魚粉、沙律醬、甜蛋、蟹柳同青瓜絲。食得多都幾滯，飲番杯「純金酒」就最啱。
小宇宙壽司$60
Size比普通壽司細一半，材料無特定，個個Order都分分鐘唔同，要睇師傅嘅思潮，見乜嘢材料新鮮先決定壽司餡料。咁多唔同材料最好歎「花尾藏清酒」，酒味夠清，絕對唔會同啲食材撞到七彩。
魚安魚康魚肝$80
夏天魚安魚康魚夠肥大，魚肝都滑啲，油份多啲又補啲。處理魚肝都好煩，粗心啲大力啲就會整爛，好考師傅手勢。魚肝味濃，「越後育酒」濃厚夠辣，最佳配搭。
食客幾句
北酒場（23147925）
地址︰山林道1號地下
