本報日前在街頭訪問了50人，問他們會追看無綫的《火舞黃沙》還是亞視的《情陷夜中環2》，其中56%受訪者選看《火》劇，但大部份人均表示因慣性睇無綫，而非被劇情吸引；有32%受訪者嫌劇情太悶，所以轉台看《情陷2》，其餘12%觀眾就覺得現今的電視劇過於沉悶，所以兩劇皆不看。
梁小姐：「有睇開《火舞黃沙》，不過睇睇吓就冇繼續睇，原因係劇情開始有啲悶。幾個主角我最鍾意蔡少芬，雖然佢今次飾演一個較年長嘅角色，但係仍然發揮得好好。」
方小姐：「我估《火舞黃沙》收視跌係因為劇種唔適合香港觀眾，我就唔太鍾意睇古裝片，而且內容重複，啲角色經常鬧人，最初就覺得新鮮嘅，但係睇得多就覺得悶啦！」
劉小姐：「我覺得《火舞黃沙》最吸引係演員陣容強勁，故事都幾吸引，若果錯過咗一兩集，我會上網睇番劇情追番。至於《情陷夜中環2》好似成日賣弄色情，好核突。」
郭小姐：「《火舞黃沙》我唔算睇好多集，但係有時間都會睇。總算OK，平均嚟講都差唔多。我覺得咁多演員之中蔡少芬做得最出色，算係好突出嘅一個演員。」
嚴小姐：「我覺得《火舞黃沙》愈來愈好睇，如果話佢收視跌，我覺得可能係亞視播《情陷夜中環2》嘅關係，同埋我覺得黎姿做得冇咁好，好似讀劇本咁。不過我都唔會轉台睇亞視。」
林小姐：「我唔會睇《情陷2》，雖然我有睇《火舞黃沙》，不過總括嚟講都唔夠之前嘅《金枝慾孽》精采，睇落就發覺冇咗代入感，可能佢講嘅古仔係種族鬥爭，唔夠宮廷故事緊湊。」
鄭小姐：「我唔係睇咗好多集《火舞黃沙》咋，暫時都冇話特別吸引，但係題材就OK新鮮，睇過好幾集，但係我對所有劇情都冇晒印象。」
