由當年被日本音樂教父小室哲哉收為入室愛徒，其後霉到做亞視三線藝員嘅譚凱琪（Zoie），同前年參選華裔小姐大熱倒灶後坐多過做嘅「翻版常盤」徐自賢，兩女都係由光明步入黑暗，同病相憐，所以呢期一玩埋竟然friend到日日約埋一齊去街，仲一齊瘟仔㖭。
早排Zoie同徐自賢齊齊黐住曾經判游蕩罪入獄嘅九巴後人雷德賢，成為對方嘅紅顏知己，上個月兩女孖咇陪雷公子食糖水兼唱K，點知呢個月已經同小雪老公陳迅元火速搭上。既然佢兩個咁恨躋身上流社會，關仁就唔多明點解前幾日佢哋喺尖沙嘴撞到記者時驚到冇面見人，唔知佢哋驚乜呢？
買木瓜鮮奶補身材
嗰日下晝六點鐘，冇化妝嘅徐自賢同Zoie孖咇出擊，喺加連威老道龍城藥房揀化妝品，當時佢哋同啲啱啱放工嘅OL迫埋一堆摷平價化妝品，揀完一輪都冇幫襯，但Zoie離遠昅到有記者影相，即時單手遮面，一招黯然銷魂掌遮掩芳顏，仲即刻拉埋徐自賢打的走人。
其實早排關仁都喺尖沙嘴柯士甸小路嘅茶餐廳，撞見徐自賢同中坑吹水，跟住就單拖行去超市買木瓜同鮮奶，唔通要補定身冧公子哥兒。
