賭王何鴻燊同十姑娘何婉琪，喺澳門單官司仲未有結果，雖然兩邊嘅證人都唔使再出庭，但唔代表呢場豪門恩怨無下文。記得前日，十姑娘喺香港幾份報紙登咗個廣告，用咗四個「不」字，叫賭王大佬唔好再「隻手遮天」，唔好再陷澳門法院於不義。
咁都唔止，為咗回應賭王嗰句「我打官司未輸過」，佢亦都引述自己嘅代表律師歐安利一句豪語：「唔贏啲官司唔會接」。點知十姑娘今次玩大咗，就係引述歐安利嘅呢句說話，搞到歐安利噚日喺澳門幾份報紙登咗個澄清啟事，內容係話，喺維護十姑娘嘅權益時，佢自己嘅作風、思想方式、策略同想法，都同十姑娘登嘅廣告內容唔同，亦唔會利用廣告嚟維護當事人嘅權益。
好明顯，歐安利唔係好妥俾十姑娘擺咗上枱，所以就登個廣告以正視聽。官司都未宣判，十姑娘嗰方面已經內訌，最高興嘅人唔使問都應該係賭王啦啩？
爆料熱線：29290000、27860099
報料傳真：26239278
報料電郵：[email protected]