S先生到內地做善事，只求心安，惠益鄉親，不及其餘，點知一經捐款，捐完又要捐，就俾內地地方衙門人員㩒住搶，捐款變成芝麻綠豆官嘅生財工具，你話幾激氣呢。
到內地做醫療慈善最氣頂。S先生捐錢畀醫務人員贈醫施藥，不收診金，以為做好事啦，點知冇醫務人員肯做，因為佢哋怕破壞其他醫生嘅財路吖嘛，內地醫生朋友直情勸S先生：「唔好搞嘞，我哋真係咁樣做嘅話，可能俾人打死！」諗真啲，未必係誇大喎，內地偏遠貧苦地區有一間醫院由香港人主理，做手術唔收錢，你估其門如市呀？拍烏蠅就真，香港人後來先至發覺，地區附近啲機構、孤兒院、醫生，每送病人到一間內地人管理嘅醫院，有回佣可受，所以佢哋個個當呢間香港人辦嘅慈善醫院透明。你話啦，免費慈善醫院邊度有回佣畀人！
以中國之大，人口之多，香港人到內地做善事、捐款，無論規模幾大，捐幾多個億，都只係滄海之一粟，可以講得係擔沙塞海，長期嚟講，解決中國之社會、教育、醫療問題，必須中國政府從制度上想辦法解決，唔關香港事。既然如此，我哋做嚟做乜？無他者，求心之所安，求對國家人民有貢獻，求回饋祖國家鄉而已，要有啲佛家思想，慈悲為懷至得。捐幾個錢就以為自己了不起者，乃井底之蛙，坐井觀天而已。
左丁山不幸無資格自稱腰纏萬貫，做善事頂多憑支筆為好人好事表揚幾句，捐現款就欠奉。記得張五常大教授講過，自私為經濟學大前提，如果捐款愈多者，愈受表揚，咁就捐款誘因愈大。講到白啲，左丁山認為沽名釣譽係一個鼓勵、刺激捐款嘅好好方法，為貧苦無依之人謀利益，社會應該表揚沽名釣譽，唔應該諷刺！（孫柏文、李兆富同唔同意呀！）