股海波濤洶湧未有嚇窒散戶，有大學生抱着刀仔鋸大樹心態，利用政府貸款入市，吼中仙股獲可觀回報，頓成同窗「股壇黃大仙」。不過，損手者也不少，有大學生炒燶股被追數，隨時影響畢業後出路。學者認為，大學應把財富管理列入課程，及早讓學生認識理財之道。
中國銀行新股上市入場費最低僅3,000多元，正合本錢不多的大學生認購。就讀城市大學會計系的Matthew見身邊人一窩蜂唱好，便與同學聯袂到銀行取認購表。處女入股海的他步步為營，「總之有錢賺就出貨，賺筆快錢就算。」
並非只識「㩒冧巴」
比起Matthew羊群心態式買股票，理工大學電子及資訊工程系三年級學生Geoffrey則成熟得多。他以二萬元政府貸款，先後購入聯華超市（980）及生命科技（1180），前者一年內股價升了三成半，後者每股由6仙半升至現時毫半，獲利甚為可觀。
但Geoffrey強調自己並非只識「㩒冧巴」的散戶。他說：「我會先上網睇吓資料同市況，睇定先入貨。」由於他投資有道，同窗經常問他「攞貼士」，足有數十人之多。他認為，學生投資應盡量保守，「除咗買股票，我兼職賺到嘅錢都用嚟月供儲蓄基金用嚟分散風險。投資梗有蝕錢，但整體計有賺，有啲人未睇定就入市，雖然蝕晒都係幾千蚊，但對學生嚟講已經蝕到入肉。」
小心理財免影響前途
大學生投資成風，香港浸會大學財務及決策學系副教授麥萃才指，大學生缺乏投資理財知識，修讀理財課程時也只顧「攞貼士」。「有學生向政府貸款，竟然唔知點樣計息同還款額。」不懂理財的後果可大可小，信貸及收賬管理協會主席黃志廣稱，大學生欠債被追數個案數字近年輕微上升，多因過度消費拖欠信用卡簽賬有關，但自去年下半年起，因炒股而導致財務陷困境的個案頻現，相信與多了大學生炒股有關。麥萃才提醒學生小心理財，否則影響前途，「就算只係欠幾百蚊卡數，但畢業後去銀行借錢買樓，可能因拖數紀錄入咗中央信貸資料庫而做唔到按揭，申請做公務員或想從事金融業，都可能過唔到個人財務審查。」
