排骨女星白癡同佢個舊相好大風遮，呢排被傳復合真係攞嚟講，因為佢兩個根本未散過，幾年嚟都拉拉扯扯。早排白癡同外籍男友玩冷戰，打畀大風遮吐苦水，咁啱大風遮嗰期不停喺內地做宣傳，身邊冇女，返香港時咪約埋白癡打吓友誼波囉，佢哋最鍾意匿喺白癡細佬儍蟲嘅西貢村屋鐵竇度春宵，但次次都前後腳，仲搵口靚仔喺村口把風。由於大風遮撈極唔起，惟有自我踢爆宣傳。
關九超現實唱走老友
關九份人小家呢樣嘢，圈中幾乎人所皆知，佢撈咗咁多年人面都算廣，但真係當佢friend嘅就真係冇乜幾個，近年佢嘅老死名單入面，又少咗一個找雨，找雨同佢識咗十幾年，本來friend過打band，兩個仲一齊做過電台節目，但因為關九唔抵得找雨搶咗佢嘅風頭，所以要求調時間做過第二個節目，之後成年都周圍唱找雨有幾唔掂，幾唔識做節目，聽到嘅人都擰晒頭，反而找雨咁耐都冇講過關九啲乜，令人對關九更反感。
假姐權勢勁封殺無姐
三色台近年好興搵番以前班阿哥阿姐返去拍劇，但搵嚟搵去就係唔見佢哋搵過以前嘅花旦阿無姐？關仁聽聞阿無姐離開三色台之前，同女高層阿假姐一直好friend，但聽聞有次阿無姐幫阿假姐喺外國買咗對名牌高踭鞋，阿假姐唔鍾意個款唔肯畀錢，兩個人就因為咁反咗面，之後阿無姐離開咗三色台，阿假姐咪利用自己勢力唔畀佢踏足娘家半步囉！