花旗銀行有份搞嘅「少年財爺」已經係第三屆啦，噚日就搞咗個頒獎禮。一如以往，今年亦係分大專組同埋中學組，主要係睇啲學生點樣振興香港經濟。搞咗三年，香港經濟自三年前中央送大禮而行出沙士低潮期，到現在持續三年增長。
主持人都話，經過三屆比賽，發現年紀愈細嘅同學，佢哋嘅創意就愈大，可能係年紀輕無束縛啩！主持人仲建議花旗，不如下年增加小學組，畀再細啲嘅小朋友發揮佢哋嘅創意同埋理財能力喎！八方諗落都幾好，話唔定可以搵到啲想像唔到嘅絕世好橋呢！
噚日大專組嘅冠軍由香港大學嘅隊伍贏咗，主題係發展時裝、建築同粵劇嘅創意工業；中學組冠軍就係嚟自聖保羅男女中學。為咗隆重其事，花旗派出集團環球個人銀行服務總經理馬立衡負責頒獎。佢叫大家千萬唔好睇小啲學生嘅建議，真係具創意得嚟，又不失可行性。
爆料熱線：29290000、27860099
報料傳真：26239278
報料電郵：[email protected]