英皇娛樂老闆楊受成的長女楊諾思，三年前與丈夫張堅庭一齊信奉基督教，上月全家更首次為福音碟灌錄聖詩，參與見證。楊諾思揚言信仰令她改變人生觀，過去三年行的路，比以往十多年都容易。每晚她還與丈夫拖手在床前祈禱，不再抱怨，擁抱愛與快樂的每一天。 撰文：林妙萍
下班時間5時30分到訪楊諾思位於灣仔的辦公室，窗邊矮櫃上放滿大堆父母子女的相片，枱頭則放了刻上視為座右銘的聖經金句「你的話是我腳前的燈，是我路上的光」擺設，楊諾思表示信教將以往愛抱怨、自我中心的性格、思想改變，令她對家庭、事業都能朝着積極、寬容的方向進發。
信基督改變態度
楊諾思一家人信教始於02年7月張堅庭懷疑患上驚恐症，在蔡元雲醫生轉介下，經突破中心的一位牧師祈禱、開導，張堅庭開始信奉基督教，經常陪丈夫去教會的楊諾思也於03年4月12日決志信教，從此改變人生觀。
事業上，父親楊受成在99年將英皇珠寶香港區的業務全數交予楊諾思接手，當時一心想着打逍遙工的她多番推卻不成，惟有肩負重任，心情跌到谷底，她說：「我鍾意過簡單嘅生活，突然間咁多嘢要我管，情緒真係好低落，成日諗阿乜乜、阿物物個仔都唔使做啦，加上爹哋喺社會上有地位，我都好有壓力。信教之後，我睇嘢嘅角度改變咗，會諗爹哋交畀我做，係對我嘅信任，所以𠵱家冇再抱怨，好投入去做。」
平衡工作家庭樂
楊諾思與下屬的關係都有所改變，她說：「以往我覺得高高在上，我係老闆喎，你乜嘢都要聽我講，𠵱家就會企喺人哋嗰邊諗吓，關心埋員工嘅家庭、生活，乜嘢事都有商有量，大家做到更加好。」
05年開始，英皇珠寶大力發展內地市場，今年計劃一年內在香港、北京、上海共開10間新店，去年楊諾思忙到暑期全家旅行只能濃縮成兩天，她謂再忙都堅持只工作至晚上7時，星期六上教會，星期日家庭樂，她說：「如果每日都要過嘅話，點解唔開開心心過每一日呢？」重視家庭樂的楊諾思上月首次全家一同為詩歌CD《親眼看見你》錄聖詩《你們要讚美耶和華》。
至於生命中最關鍵的兩個男人：父親楊受成及丈夫張堅庭，前者幫楊諾思揀了一條事業的路，後者則是她自己揀的，結婚13年，她有信心與張堅庭攜手行完人生路，她說：「我人生中最正確嘅選擇就係揀咗嫁畀阿庭，佢有90幾分，係一個好好嘅聆聽者，好善解人意，畀我好多空間。由拍拖到93年1月3日結婚，十幾年來我出門佢從來冇問我同邊個去？有冇男人去？對我係完全信任。」她謂兩公婆每一晚臨瞓前，都會拖住手在床前祈禱，她說：「就算其中一個唔喺香港，都會拎住電話一齊祈禱。」
每晚為父母祈禱
談及父親楊受成，楊諾思說：「佢係好嚴格嘅父親，我哋自細唔使打，爹哋好惡，一望我哋就驚，自動乖晒。細個最深印象係逢假期，父母會帶我哋四姊弟去青山公路十七咪半遊山玩水，好開心！雖然佢同媽咪都唔信教，但我每晚都會為佢哋祈禱，又會傳金句短訊畀Gilbert（弟弟楊其龍），希望有一日佢哋都會信主。」
後記：神迹？
做完訪問，記者離開灣仔到中環的車程上重看專訪照，攝影師阿嵐表示細心安排的大相甫士，楊諾思的笑容比較硬，最好一張反而是她手執兩張詩歌CD的相片，樣子看來平和兼眼神有光采，令沒有宗教信仰的記者與攝影師都不約而同說：「唔通真係神迹？」
攝影：陳志嵐
