靚太真係唔易做，除咗經常要扮得靚靚，仲要知慳識儉，伍詠薇就深明此道，噚日喺屯門出席Osim活動，伍姑娘講明希望大會送張按摩椅畀自己。
訪問嗰陣伍姑娘見記者身後有公關，就把握機會話：「我真係唔客氣，好想佢哋送張按摩椅畀我！就算唔得，好似空姐買機票，一折賣畀我都得，我都好想送按摩椅畀老爺。」公關見佢咁大聲，都好識做猛話會寫低佢嘅要求。而伍姑娘又同《高朋滿座》嘅演員鄭丹瑞（阿旦）、鍾景輝同李思捷派禮物畀觀眾又同佢哋玩遊戲。
阿旦爭櫈仔
另外，做咗兩個囡囡爸爸嘅鄭丹瑞，佢平時返屋企就要同囡囡爭櫈坐，佢話：「我自己買咗張按摩椅，點知放工返到屋企，就見到佢哋攤屍喺上面，要爭先有得坐㗎！」