話說煲呔成功爭取立法會大多數議員（五十票）支持佢喺添馬艦起政府總部，連白鴿黨都話冇問題，背後有段古值得一提！就係鬍鬚仔曾俊華喺最後關頭發功，搞掂白鴿黨。
據白鴿黨主席高達（李永達）話，佢哋一直向政府要求，要明確保證下亞厘畢道嘅舊政府總部會受到全面保育，佢哋先支持喺添馬艦起總部，但係由於政府內部有唔同意見，所以見親行政署署長謝曼怡，佢都只係打官腔，話冇得保證，到時要聽城規會話。
高達當然好冇癮，諗住會投反對票，結果走去搵曾俊華攤牌，重申立場。
鬍鬚仔知事關重大，不敢怠慢，即時答應有得傾，最後梗係得到煲呔御准佢喺兩間報紙寫文章，保證達到白鴿黨要求，話咁易事情轉勢，都係一兩日嘅事，所以連高達都話，鬍鬚仔有前途，應記一功。
八方忽然諗，舊年單政改方案，如果曾俊華已經去咗特首辦，形勢可能好唔同，始終肥龍唔肯咁低聲下氣同民主派交易，咪全部泡湯囉！
爆料熱線：29290000、27860099
報料傳真：26239278
報料電郵：[email protected]