亞視新劇《情陷夜中環2》因正面對撼無綫的《火舞黃沙》，為了知己知彼，《情陷2》的幾位演員都有看過《火》劇，大部份人表示不太習慣《火》劇色調過黃，令眼部看得疲倦，也有人認為劇情欠新意。
張文慈：「我開頭都有睇過幾集《火舞黃沙》，不過因為拍得個色調太黃，睇到對眼都有少少攰。劇情又冇乜新鮮感，我對於呢類劇嘅興趣一般，所以睇咗幾集就冇再睇落去。」
陳啟泰：「我啱啱去完《火舞黃沙》嘅實景拍嘢，嗰度真係好靚，但我覺得冇必要將套劇調到咁黃，將啲靚女演員變咗黃面婆，始終黃色會有陳舊效果，效果唔sharp。」
葉璇：「我覺得《火舞黃沙》個個演員都靚仔靚女，又好演技，但做咗黃色效果就有少少睇唔真。不過佢哋同《情陷2》唔同劇種，至於要揀邊套好睇啲，梗係由觀眾去決定。」
麥家琪：「我覺得觀眾係現代人，梗係最好睇番時裝劇，加上睇電視嘅觀眾一般係師奶同OL，愈簡單嘅嘢愈啱佢哋口味。加上我睇唔慣咁黃嘅色調，睇得耐好攰吓。」
李思蓓：「我以為《火舞黃沙》好似《金枝慾孽》咁，大家着晒靚衫爭個死你死我活，但原來竟然好似阿泰（陳啟泰）咁講爭嚿泥。不過我都認同演員喺呢啲環境拍攝真係好辛苦！」
