黃又南通心銀鈪
「呢隻鈪係我兩年幾前去印度拍戲時買嘅，其實全個印度都有好多地方賣銀器，仲刻有925純銀標誌。我當日見到隻鈪以為好重，點知攞上手就好輕，原來佢係採用空心設計，我好後悔冇買多幾隻。好多人戴銀器都習慣用洗銀水久唔久抹吓，不過我就唔會理，我反而鍾意有啲黑黑哋嘅污糟感覺。」
許志安金戒遮醜
「我好少戴戒指㗎，因為我手指好肉酸好短。但係好少見呢啲金色嘅戒指，覺得好靚，戴咗落去又覺得隻手指唔係太短，遮到我嘅缺點，同埋我戴嘅戒指唔可以太緊，因為唔鍾意箍住。我經常諗，當我拎住支咪唱歌時，觀眾睇住我隻手閃閃吓，咪睇唔到我啲手指？」
徐天佑訂做鑽環
「隻耳環係我專登訂做，之前戴慣咗一粒鑽石嘅耳環款式，所以就設計咗呢個款，最特別係耳環係類似G字形嘅，fit晒耳珠個位，由前面包到後面，總共鑲咗10粒鑽石，價錢唔係太貴。其實用再細啲嘅鑽石會再平啲，但可能要用幾十、甚至過百粒，出嚟效果冇咁搶眼。」
吳家樂愛心頸鏈
「呢條頸鏈唔知幾多錢，因為係老婆送嘅，原本仲有條手鏈一套，不過俾我唔小心整爛咗，所以攞咗返去整，雖然條鏈係膠質，但我覺得好啱我，因為我平時成日做運動唔使除，而且仲係黑色，好易襯衫。我有好多飾物，每次去旅行見到啲好特別嘅都忍唔到手要買。」
採訪、攝影：馬建華、王連連、王崇穎
