猩猩王同已經殺入荷李活嘅混血女星分開咗又喺埋一齊，主要係因為猩猩王大姊同混血女星好鬼熟，成日叫埋混血女星出席家庭聚會，見吓見吓又撻番着，混血女星仲行埋家翁政策，得閒就會約猩猩王兩父子一齊食飯。混血女星好鬼鍾意猩猩王，如果唔係當年都唔會有個靚仔明星男友，仲要搭上猩猩王，不過佢都知猩猩王唔定性，好多女朋友，睇怕佢想綁住猩猩王唔係咁易。
過氣字母嫂轉呃洋漢
過氣字母嫂自從同字母哥離婚後，為咗可以繼續過奢華生活，就不停四圍撲水，雖然佢都拍過吓戲，但就唔多成功，惟有靠天賦本錢搵食，以前就有唔少內地豪客貪新鮮包佢，但最衰過氣字母嫂口疏，為咗宣傳，四圍同人講乜乜老細追求佢，搞到啲內地富豪怕晒，佢惟有轉移陣地向鬼佬埋手，又唔理正負面新聞，總之見報為上，然後攞住份中文報紙去呃鬼佬，話自己係大明星嚟抬高身價。
囂張名模自食其果
香港地啲所謂名模，有時都會三分顏色上大紅，好似近年轉戰內地話做主持嘅Y記，多年前同個知名度唔高嘅男band友拍拖時，不知幾囂張，啲記者問乜都話係私隱，質到人哋一面屁，搞到冇人埋身，冇人睬兼冇騷行，眼見同期嘅高妹、整容王，同後輩假波個個彈起，先至識喊蝕底。舊年開始佢見親傳媒就自動波行埋去打招呼，仲要扮晒親切，假到痹！