寵物花園：為食貓愛榴槤　不愛留連

寵物花園：為食貓愛榴槤　不愛留連

講起為食大懶貓，第一時間諗起加菲貓，今日主角Mimi就係現實版加菲貓。佢比加菲貓更為食、更寸、更平易近人兼更懶，為食到連一陣味嘅榴槤都啃得落、平易近人到係人都可以當佢BB咁抱、寸到有時連主人都唔睬、最離譜係懶到話瞓就瞓，寧願攤喺屋企都唔願喺街留連。

記者：許維雅　攝影：伍慶泉

小檔案

姓名：Mimi（8歲）
性別：女
品種：蘇格蘭短毛摺耳
至愛食品：榴槤
性格：聽話、貪吃貪睡、懶到唔識郁

見榴槤即撲埋身

■Mimi離遠見到至愛榴槤，即時鼻仔郁郁虎視眈眈。

■索多兩索忍唔住衝埋嚟，睥住個膠袋，眼神充滿期待。

■有好嘢食真係乜儀態都無晒，理都唔理其他人，係咁舔。

愈臭愈熟愈鍾意食

為食貓見唔少，為食到連榴槤都食就真係第一次見。蘇格蘭短毛摺耳貓Mimi今年8歲，跟主人一樣咁鍾意食榴槤，仲愈熟愈臭就愈鍾意，記者一將果王帶入屋，Mimi立刻鼻仔郁郁係咁索，阿祥話：「因為自己鍾意食榴槤，所以成日買返屋企食，記得有次我食得津津有味，Mimi無端端跳上梳化望住我，好似等我餵咁，我咪畀嚿佢歎吓囉，點知佢真係食喎，之後我次次開親榴槤佢都貢埋嚟，整整吓愈嚟愈鍾意食，平時佢叫極都唔郁，𠵱家一有榴槤就自動埋身，愈熟愈爛嘅榴槤佢愈鍾意，因為腍腍哋可以細細啖擺入口。」

■Mimi最愛瞓紙盒，唔使高床軟枕，只求三餐溫飽。

減價$2,000帶返屋企

阿祥之前一直無打算過養貓，7年前無聊行過寵物店，見到Mimi又乖又可愛，先係咁意抱上身玩吓，再俾店員𠱁兩𠱁，埋尾一輪講價，最後成功由$6,000講價到$4,000帶返屋企，阿祥回憶：「本身真係無諗住養貓，個店員一見我抱住Mimi就講咗句：『你抱住佢佢肯瞓，即係好跟你呀！」就係咁忍唔住買咗，好彩Mimi好聽話，養咁多年從未抓花過任何嘢，傢俬一條貓抓印都無。啱啱買返嚟嗰陣Mimi好活躍㗎，周圍走坐唔定，𠵱家就懶到郁都唔郁，淨係鍾意食同瞓！」Mimi絕對係加菲貓一隻，唔知佢係咪最憎星期一呢？

打死唔出街

■阿祥話Mimi好唔鍾意出街，如果有人企喺屋入面，佢會第一時間撲返轉頭。堅定流呀？試驗吓先。

■果然，阿祥一企出門口，Mimi立刻嚟個大轉身撲去企喺屋入面嘅祥嫂，仲好似BB咁用手搭住人膊頭，真可愛。

■如是者，我哋試咗好多次，Mimi都係做同一個動作，最搞笑係佢從來無逃走嘅意思。

表情多多

■Mimi由細到大都好少發惡，你睇佢打呵欠個樣，幾Cutie？

■諗住掟個波畀佢玩吓，兩個主人用盡口水都叫唔郁佢，你睇佢個樣仲好鄙視咁。

■勁舔脷，一有嘢食就當全世界人無到。

人人都可以抱

Mimi從來唔太抗拒陌生人，仲可以好似BB咁任抱唔嬲，又可能因為Mimi係一等一為食，所以容易訓練，阿祥由Mimi5個月大開始教佢，𠵱家識得畀手、識得Sit、仲識得雙手離地企起身，問你服未？阿祥：「Mimi好聰明好易教，其實教貓同教狗一樣，只要餵佢哋之前，習慣性要佢哋做動作就得㗎喇，貓一樣可以。」Mimi咁識討主人歡心，難怪日日都有咁多好嘢食，除每個星期日有雞肉食外，逢生日仲有新鮮帶子開生日會，生活真係好過加菲貓。

■阿祥買BB仔食嘅BabyFood雞肉餵佢，屋企有好多存貨。

■Mimi仲識表演立正企好，仲企到成隻企鵝咁穩陣㖭。

■有得食就乜都肯做，畀手仔都肯，無着數？睬你都儍喇。

無食嘢兩星期

唔好睇Mimi食得好住得好，肥肥白白咁，其實Mimi都試過大病一場，嗰次係唯一一次Mimi唔食嘢兩星期。Mimi1歲左右，試過患喉嚨潰瘍，餵佢食嘢食一啖就唔食，因為一食就覺得痛，睇見就可憐，最後仲俾個無良醫生搞到一驚就失禁。阿祥話：「嗰次真係好嬲，明明Mimi係喉嚨潰瘍嘅小病，荃灣嗰個獸醫同我哋講話Mimi患貓愛滋，根本就想呃我哋幫Mimi驗呢樣驗嗰樣，最後加埋吊鹽水同照X-Ray，要$7,000埋單。咁都算，最慘係我唔知個獸醫點樣折磨過佢，嗰次係我第一次見到Mimi發惡，搞到𠵱家Mimi一驚就瀨屎瀨尿，好似患咗恐懼症咁！」

■好多貓都唔鍾意着衫，Mimi好乖，着衫無詐型。

■Mimi細個唔係咁懶，好活躍好鍾意玩衣架。