杜琪峯可說是林雪的伯樂，在片場當場務的林雪，98年獲對方賞識，在《暗花》飾演小角色，憑其演戲天份嶄露頭角，後憑《PTU》勇奪金紫荊獎最佳男配角，然而對於這位伯樂，林雪心中有愧，原來當年拍《大事件》時，因演出失準，令阿杜非常失望，更在他面前狠狠自摑。 撰文：陳月媚
林雪自從接拍了《暗花》後，邊替杜琪峯的電影做場務，邊擔演小人物角色，但觀眾早已對他的演技留下深刻印象，林雪表示：「幫杜Sir做場務時，成日叫佢畀我做戲，起初佢唔理我，後尾先畀我試，初時乜都唔識，成日俾佢鬧。有次拍《鍾無艷》，杜Sir又當住好多人面前係咁鬧我，我終於頂唔順同佢講，問佢可唔可以唔好成日當眾鬧我，呢次之後，佢真係三日都冇再鬧！」
唔鬧唔安樂
林雪或許是犯賤，幾天沒被阿杜罵，即感到不自在，林雪笑說：「以為導演嬲咗我，所以問佢點解幾日冇鬧我，點知杜Sir話：『你係咪賤格呢？你做得好，我無端端點解要鬧你，你估我變態要日日搵人嚟鬧？』聽佢咁講我先安樂晒！」
不過林雪拍攝《大事件》時，就有滿肚苦水，他說：「有一場戲杜Sir叫我自摑，我打極佢都話我唔夠力，後尾佢好𤷪咁拍完呢個鏡頭。我知佢唔滿意，咪走去問佢係咪做得唔好，點知杜Sir喺我面前好大力咁摑自己，摑到兩塊面紅晒，幾乎連眼鏡都飛甩埋，然後好𤷪咁同我講：『咁打好痛咩！』當時我一粒聲都唔敢出，好內疚。」
蝕光血汗錢
原來林雪拍《大事件》時，投資百多萬在內地開卡拉OK，豈料蝕光血汗錢，故心情極差，影響演戲。林雪歎息說：「杜Sir唔贊成我做生意，佢話我唔係做生意嘅材料，所以我都唔敢同佢講，拍《大事件》時，我心情係最差，演出冇晒水準，真係有苦自己知！」
錢蝕光了，路總要繼續走，林雪認為只要長拍長有，能養妻活兒便心足，他說：「一部戲入面，每個角色都有佢嘅功能，做得出唔出位，在於演戲嘅人，總之一定要帶住開心嘅心情去做，咁就會做得好。我唔會奢望做大明星，演戲只不過係興趣同職業。」
