去年8月，上位小生吳卓羲在無綫《兒歌金曲頒獎典禮》上被鄭欣宜啜啖後，星運忽然逆轉。這個「死亡之吻」只是前菜，往後湧現的負面新聞才得人驚，𠝹女王、粗口精、唱歌差跳舞渣……連環不幸事件浪接浪。一直採避談態度的吳卓羲，今次狠狠認衰認錯認當黑，真情剖白他的七宗罪。 撰文：朱倬誼
吳卓羲本來是型男，也是無綫頭號寵兒，去年被安排在歌、影、視三棲發展，在《兒歌金曲頒獎典禮》上特別醒他被鄭欣宜啜啖的話題良機，沒想到吳卓羲此後星運驟降，𤓓事日日有、新聞單單衰。
這天，吳卓羲一開始接受訪問，已坦承為過去大半年的負面新聞感到有點失落，他說：「係會有唔開心，點解會係我呢？但又冇得諗咁多，其實係突然間被人寫咗一輪，始終自己都要面對，有啲事係經一事長一智。我鋪鋪都瀨嘢，自己拍《亂世佳人》時，話我掉劇本、對導演講粗口，我會驚公司以為我有做過，但你會唔會兜口兜面用粗口鬧導演？」
黑面賴老竇
不過，吳卓羲卻自認說話態度和演繹沒問題：「我問心無愧，劇本有問題，我會直接同導演、監製去講，但唔會攞住劇本用粗口同導演講，我都擔心被人話粗口精，係好大隻死貓質埋嚟。粗口，係有講，唔係連環掃，儍㗎咩？除非自己唔想做，次次有記者嚟探班就講粗口？你屈我，我冇得反駁，有乜途徑呀？冇途徑！我有做過、有諗過，我衰仔！但我點都唔會因為被人冤『厲』而影響做嘢。」
若吳卓羲行得正企得正，何以在芸芸小生中，只得他成眾矢之的？他連忙說：「我當黑，當黑已經概括好多事，咁多個嚟講，我係最唔識得表達自己嗰個，明我嘅知我係個乜嘢人。言語上，我畀人感覺『倔雷槌』，冇尾音，係咪唔想做咁，我聽番以前一啲訪問，係喎，好倔，會唔會令人唔舒服呢？開始明。我同屋企人溝通都係咁，我個樣來自我爹哋，我爹哋成個關公咁，坐喺度睇電視都皺晒眉頭唔識笑，諗番我會唔會似我爹哋，唔係賴佢，係我以前唔識笑，𠵱家學識待人接物，尤其喺娛樂圈，自己同人溝通嘅方式唔係啱每一個人，自自然然會改變。可能係我錯，可能我表達方式太直，糾正番，大家都舒服。」
吳卓羲在無綫中一定是花名最多的小生，有「吳唱K」、「羲哥」、「小霸王」，最新一個是「𤓓王」，但當事人只能苦笑：「小霸王係人哋稱呼啫，點會？又唔會打人，我個樣比較cool，但待人接物OK，有表情㗎，係比較慢熱，人哋啱啱識我，好似唔多講嘢，唔敢同我接觸，識落會估唔到我有幾多嘢講，係搞笑嗰類人㖭
怨氣化力量
被形容「𤓓」、「霸」都次要，吳卓羲最惱是被人指為粗口精、鬧人狂，由鄭嘉穎、梁靖琪（Toby）到監製潘嘉德，都成為傳聞中被他媽叉的對象，吳卓羲說：「得啖笑啦，話我講粗口又鬧監製又鬧Toby，做宣傳就怒睥德哥（潘嘉德），好無奈，係德哥捧我出嚟，搵我拍《衝上雲霄》，點會怒睥佢講粗口？嗰日在場記者起碼30個㖭呀；嘉穎，我冇同佢合作過，覺得佢好傾，鬧佢？好彩我識佢同佢講番；Toby識佢好耐，係好好朋友，會唔會喺記者面前鬧Toby呀？」
昔日吳卓羲深受公司寵愛，但近期無綫改捧黃宗澤和鄭嘉穎，吳卓羲只能說：「每個人都有高低潮，永遠都係你叻晒咩？會有唔開心、唔如意事，諗吓點將啲唔開心化成力量仲好啦。啲人睇完啲新聞之後對吳卓羲有冇影響？會有，我係有唔開心，但一路沉落去都冇用，點去補救唔係一朝一夕，做好自己嘅工作畀人睇，唔好只係睇我呢啲新聞。」
攝影：陳慧安
服裝：DKNY
場地提供：上環十大書坊
