「1928年的BugattiType37，是Type35的另一個賽車版，它靠車速的氣流作冷卻，所以一開車便不能慢過110km/h（香港最高法定時速）。有幸看到這部老爺跑車，全因『老爺』被『香港珍藏車協會』邀請到深圳展覽，在運上深圳前一天，我趁機幫它拍下這輯靚相，唔使上深圳都可以欣賞得到它的真面目。」
記者：黃婉冰 攝影：譚盈傑
鳴謝：香港珍藏車協會 地方提供：S&PAutoLtd（23926348）
可以「親眼」欣賞這架1928年的Bugatti，全因「香港珍藏車協會」由今日起至6月7日，在深圳福田區新會議展覽中心舉辦「第五屆深圳汽車嘉年華」，除了展出會員珍藏靚車外，還特別向日本1位收藏家借來2架經典的老爺車，其中1架是BugattiType37，而另1架是古董MG跑車。
試諗吓，18架加埋幾百歲高齡的老爺車，一齊由上水經黃崗再駛入深圳福田區，場面何其壯觀。
1928年Bugatti每次出動要110km/h
講Bugatti可能未必人人都識，但只要一睇相，十個有九個都會話見過這架車，又難怪，市面實在有太多它的模型車，但講到真車，香港就沒有1個真真正正擁有，而今次展出的這1架Bugatti37，亦是車會會員阿偉向他的日本籍朋友兼老爺車發燒友情商借來的。「我同佢識咗好耐啦，同佢借車到運到嚟香港前後都只不過10日，一問佢借，佢就即刻應承啦，佢都係一名老爺車發燒友，除咗呢架外，屋企仲有30多架同類型嘅老爺車，有落場嘅賽車，又有民用嘅型號。」阿偉表示。
雖然眼前這架老爺跑車保養得非常新淨，一塵不染，甚至連生銹位都幾乎沒有，但仍然令我很懷疑，這架已年屆78歲高齡的「老頭」究竟仲Work唔Work？「想」時遲那時快，未及開口問，兩隻耳仔已經聽到一陣響通街的低沉引擎聲，唔使問阿偉，這一下撻車聲足以證明這車果然寶刀未老！
見阿偉一下子跳上車，撻匙再入波，動作俐落，還以為要將這架老爺車征服絕不難，怎知原來要駕馭得來，少一丁點技術都唔得，「老爺車機件設計同𠵱家啲車始終唔同，個腳掣油門和離合器都較緊，控制比較難，同埋呢架始終係落場版嘅賽車，無風扇設計，要靠迎面而來的冷風作冷卻，所以唔可以慢車，車主話一低過110km/h就會水滾，但我試過開80km/h，感覺好好，好暢順。」
法國戰車 贏盡過千賽事
產自法國的Bugatti，是以前賽車場上最為人熟知的賽車之一，特別是車系中的Type35，更被譽為賽車中最成功和最好的型號之一。這部幾乎戰無不勝的戰車，就曾經贏過過千項賽車比賽，1926年更奪取過GrandPrixWorldChampionship，最顛峯時期，Type35a更做到平均每星期贏取14個獎項，如此戰績，相信無車能及。亦因如此，車廠便利用2公升直列8氣缸的Type35，打造出另1架有更高性能的直4SOHC1.5公升變種Type37。
解構老爺Bugatti
奇珍異車逐架睇
除Bugatti外，今次的珍藏車展覽，同時會展出10多部極具收藏價值的老爺車，有些款式更是前所未見，無暇返深圳睇？無問題，睇相都一樣啫！
1965年ACCobra
係咪好熟呢？電影《戀戰沖繩》中，張國榮就係揸呢部眼鏡蛇，原本Cobra只有4.7公升引擎，但1964年Shelby為抗衡法拉利跑車，與福特共同造出這部擁有490匹馬力的跑車，扭力高達679Nm，全車用上鋁合金製造，是當時最快的跑車之一。
1973年FerrariDino
最經典的FerrariDino，法拉利獨子DinoFerrari於1969年賽車中意外死亡，父親為紀念兒子，將所有6氣缸引擎的車種，都以DINO為名。V6的Dino擁有一台2,418c.c.引擎，最大馬力143匹，時速高達233公里，仍是當今其中1部最快的法拉利跑車。
1939年MGTB
MGTB有台1,250c.c.直4引擎，馬力55匹，車重735kg，MGTB是第二次世界大戰初推出，基本設備和TA版差不多，其引擎組件是向Morris10借用，所以耐用性和性能都非常好，亦因為結構和Morris差不多，所以今時今日仍有二手零件供應。
1953年MGTD
1949年登場，是用來代替TC版本，TD有新底盤，但機械配搭和波箱就沿用TC設計，胎軨方面則放棄19吋，轉而用上較小的15吋，令彎路的靈活性大大提高。由於操控好，外形靚，自1949年至1953年，合共生產了29,664部，其中1,710部是TDMarkII。
1986年DaimlerLimousine
DaimlerLimousine車長達5米半，車重2,133kg，4.2公升直6引擎，最大馬力164匹，波箱竟是3前速自動波，廠方當年是按客人要求造車，所以每部車都有不同特點，而且同款DaimlerLimousine曾經成為英國皇室和港督的座駕。
