余文樂已經約滿所屬嘅環球唱片公司，盛傳佢會泊林建岳碼頭，跳槽去東亞唱片，同谷底王許志安做同門師兄弟，唔知佢係慶祝脫苦海抑或加盟新公司，前日凌晨就約埋女助手同司機，去咗灣仔嘅喜記擦避風塘炒蟹。
無懼面對大門
當時大概凌晨一點幾，戴冷帽嘅樂仔身穿長袖衫同牛仔褲，同司機、兩個女助手一齊到喜記開枱擦蟹，佢哋坐喺近門口一枱，樂仔直情懶理食相曝光，對正門口坐，四個人嗌咗六、七碟餸菜，幾乎全部食清光，作為可口可樂代言人嘅樂仔仲好識做咁揀咗支樽裝可樂喺枱面㖭。
呢餐蟹宴當然由樂仔做老細，食飽埋單後，樂仔帶頭離場，邊行邊同兩位女助手揮手講拜拜，再由司機接送返歸。
咪睇樂仔身形瘦削，其實佢都識飲識食，前晚又約咗導演劉偉強去九龍城粗菜館開飯，呢間食肆都大有來頭，蔡瀾就曾經為呢間食肆題字，大讚佢炒嘢美味。樂仔同劉偉強以前合作過《無間道》，今次嚟個夜半炒嘢，唔知係咪又有新搞作呢？
Textby關仁
