公民黨嘅六四立場受到外界質疑，搞到黨主席關信基要喺《A45》報盡訴心中情，仲預先張揚今晚燭光集會六位立法會議員一定到齊以示支持平反六四。
不過，關主席可能一時善忘，唔記得黨魁余若薇早前已經向黨請假，皆因佢個大女喺美國以非常優異嘅成績大學畢業；余大狀一家噚晚已啟程飛美，準備參加大女畢業禮，所以今晚唔可以去維園悼念六四亡魂。
余若薇唔去得，不過，其他五位議員包括湯狀、傑哥、吳靄儀、張超雄以及譚香文就分好晒工，喺維園兩邊入口向市民派傳單，主席關信基就滿場飛。
余若薇有民主女神個名你叫，佢大概會係身在美利堅心在港，可惜呢個世界成日都係好難兩全其美，只好任擇其一，個女大學畢業始終係人生一個重要里程碑，為人父母又點可以唔出席，於是余太狀只好請大家放過佢一次，今年今晚冇法喺維園相聚，都唔怕嘅，仲有明年、後年……市民年年都會等你。
爆料熱線：29290000、27860099
報料傳真：26239278
報料電郵：[email protected]