香港管理專業協會同市場推銷研究社，齊齊搞嘅第38屆「傑出推銷員獎項」，噚晚頒獎，又係機會畀一眾代理行耀武揚威嘞。先嚟係美聯5位參賽者，同港置嘅4位員工全部得獎，恭喜晒。
9位傑出推銷員，主要嚟自市區及新界嘅龍頭大行，美聯嘅有黃泥涌道分行陳靜薇、何文田山分行黃慧劍、海逸豪園分行殷勒麟、荷里活廣場分行容民基，以及駿景園分行文得威。
港置方面，包括駿景園分行嘅雷少嬌、泓景臺分行連家碧，以及兩位嚟自貝沙灣分行嘅黃錦彬同埋林景明。
佢哋嘅職銜，唔係客戶經理就係營業經理。不過，各位讀者又唔好捉錯用神，搵代理買賣物業，唔一定要經理級先可以放心嘅，𠵱家代理行業都已經規範化同集團化，即使有問題都可以投訴，再唔係就搵蘋果嘅「樓市特攻隊」幫手囉。唔知大家受唔受蘭西嘅推銷呢？