香港記者協會噚晚喺洲際酒店舉行第38周年晚宴，煲呔去咗廣西考察唔見人，搵咗行會成員夏佳理做替身出席。
係人都知道夏佳理好多銜頭，行會成員、馬會主席，最近仲做埋港交所主席。件件銜頭都非常猛料，但佢好識做咁話，最鍾意嘅title始終係「FriendofMedia」（傳媒之友），致辭時又大談新聞自由嘅重要性，將新聞自由同股票（港交所）、賭博（馬會），話呢「三寶」對香港都好重要，名副其實係「馬照跑、股票照炒、新聞就照報」，冧得全場班行家鬼咁開心。
今年記協首創Q&A環節，成班行家自然大把問題，夏佳理一於關定大門，話問乜都得，總之就唔問得「JA」，搞到全場一頭霧水。原來「JA」係佢太座JohannaArculli嘅縮寫，然後仲口出狂言，話最想買起晒班行家，等大家乜問題都唔使問。
蔣麗芸唱歌劉江華捐錢
之後就到表演項目，民建聯好捧場，蔣麗芸同高永文以及馬維騄打頭陣，劉江華梗係支持自己友，買咗一圍枱仲捐錢，佢哋唱咗隻太監之歌《把根留住》。
講開黨，公民黨總動員出席，包咗兩圍，自由黨同幾大地產商都有捐獻，單單唔見白鴿黨。
公民黨四大狀初試啼聲，處女登場出席記協舞會，一場棟篤笑賣笑就籌到10幾萬。
平時官仔骨骨嘅傑哥最多聲氣，佢話公民黨籌款手風麻麻，不如開拍《MP:3》（MissionPossible:3），男主角當然由黨內靚佬湯做，大橋係靚佬湯大戰竊聽黨，背景係西九、啟德同添馬艦，湯家驊聽完笑到氣咳，佢又話可以變賣余若薇啲珠寶。
公民黨早前去台灣訪問，傑哥話佢哋國語認真不靈光，講公民黨變成國民黨，余若薇笑言公民黨可改名「香港共同政策黨」，簡稱「共策黨」，讀唔正普通話發音隨時變成「香港共產黨」，俾傑哥開完玩笑，余大狀亦自嘲一番，話細個俾阿媽偷聽講電話，怕佢亂識男仔，大個就俾「阿爺」偷聽，怕佢勾結鬼佬，真係無奈，佢話諗過用飛鴿傳書，可惜白鴿自身難保。
煲呔身在廣西，捐出個煲呔籌款，可惜乏人問津，最後由史泰祖醫生捱義氣用38,000蚊買起，湯狀話人人認為曾蔭權一定連任，但佢測字後認為未必，因為曾字同「曾經」個曾字一樣，若屬過去式，煲呔出年就冇運行嘞。噚晚，記協共籌得49萬5千蚊，毓民認真好嘢。
傳真︰2623-9278
電郵︰[email protected]
