東涌屋苑向來受機組人員歡迎，貪返工方便就腳，區內屋苑耐唔耐就有機師或者空姐入市，長賣長有。其中藍天海岸5月份有4宗成交，比4月份升咗3成幾，算係逆市上升，當中一宗就由外籍機師買入。
中原潘綺萍話，嗰位外籍機師睇好香港樓市，諗住是但搵個最近機場嘅屋苑睇吓環境，做定功課，點知去到藍天海岸，就俾個環境同間隔吸引，即刻以355萬買入3座高層C單位，1175呎，呎價3021蚊。
單位享全海景，原業主花咗20萬裝修，又將3房改成2房，間隔同設計都啱晒外籍客口味，睇咗1次就買，原業主見個客咁快扑槌，收少佢13萬，但計番03年買入價240萬，都賺咗115萬離場。