06年6月6日即將來臨，呢個在西方人心目中極邪的魔鬼「666」，傳聞會引發颶風、海嘯、地震等災難性的世界末日。到底魔鬼有幾得人驚？呢位正宗美國人Brian先生，即刻同你講吓點樣引鬼上身，如果你膽小就咪睇落去喇！
記者：羅灝汶
攝影：譚盈傑、周旭文
末日凶兆
06年6月6日即將來臨，呢個在西方人心目中極邪的魔鬼「666」，傳聞會引發颶風、海嘯、地震等災難性的世界末日。到底魔鬼有幾得人驚？呢位正宗美國人Brian先生，即刻同你講吓點樣引鬼上身，如果你膽小就咪睇落去喇！
開天眼為撞鬼
來自美國的Brian來港11年，早於20年前仍身處美國就已經開始同朋友玩西洋「碟仙」遊戲。Brian：「以前唔識個『死』字點寫，成日同朋友去玩邪靈遊戲，但其實外國好多通靈方法都係由東方傳入。」12歲時Brian就跟一位到過越南打仗的叔叔，學識咗開天眼（陰陽眼），但詳細方法Brian就不願透露：「佢喺越南帶咗一把作過法嘅有佛像頭嘅短劍回來，話把劍有辟邪作用，於是我同朋友玩親邪靈遊戲都一定帶喺身上，防止出事。」
上得山多終遇虎，有次Brian同5個朋友凌晨時分去踩板，去到一個舊地盤，就撞邪喇！Brian：「我第一次見到咁多靈體，大部份都可以見到人形，只有其中一個令人不寒而慄，令人非常不安。佢全身黑色，一睇就知係惡鬼，我哋成班細路唔怕死，仲拎把劍去嚇佢哋，點知嗰個黑色嘅惡鬼同其他靈體商量過後，有間未起好嘅木屋突然間『砰』一聲，成間散晒，嚇到我同朋友即刻踩板離開現場！」從此之後，Brian就開始跟叔叔鍛煉靈魂，防止邪靈附身。Brian：「自從學識加強靈力同開始信教，我已經唔再去玩邪靈遊戲。」
引鬼方法1：最多人玩碟仙
西洋碟仙叫OuijaBoards，Ouija來自德文同法文的合併字「Oui」和「ja」，意思是「Yes」。OuijaBoards上多數有齊26個英文字母為基本，再加上0至9的數目字。Brian即場示範的OuijaBoard是用紙、筆畫出，不過就省略了數字一項，他說手上可用任何物件作出輕觸標記。OuijaBoard的玩法和中國人的「碟仙」相似，首先心中要想起一個有聯繫的靈體（過世親人比較安全），然後心中默念想知的問題，手上的接觸體就會隨着靈體的意念而郁動，從中得出單字或者「是、否」的答案。Brian表示精神力不強的人千萬不要亂試，否則好容易被靈體控制，好似70年代恐怖電影《驅魔人》中的主角，就是玩OuijaBoard而令身體被魔鬼佔據。
引鬼方法2：蠟燭看前生
Brian除咗懂得一般遊戲通靈，原來外國相傳只要凌晨零時後，將房間的燈光全部熄滅，只點着2支蠟燭，再全神看進鏡中自己的眼睛，就可以看到前生。那麼Brian又看到了甚麼呢？「我的前生是一個中國人，因此我好愛香港。」不過Brian就叫大家唔好亂試，因為呢個方法好容易招惹靈體。
驅鬼法：靈魂鍛煉
除咗教人撞鬼，Brian亦提供咗一個靈魂鍛煉方法教你避鬼。其方法與印度的「冥想」相似，同樣是跟越南退伍軍人學回來，「就是用強大的信念去控制夢境內容，我自己同朋友都花了一年多時間練習。」從此以後，Brian就可以用意念去令靈魂離開身體，也即靈魂出竅。Brian：「當靈魂修為至一定程度，可以幫人驅鬼。曾經有位朋友有邪靈附體，我都係用呢個方法去幫助佢，不過要有人指導先好學習，否則都幾危險。」
引魔道具
聽過Brian的親身經歷，小記都開始有點相信邪靈附體的事實，而現實中有不少朋友喜愛收藏有關魔鬼或者邪靈的飾物玩具，究竟呢啲收藏品又會唔會吸引靈體呢？Brian解釋說，一些邪教標誌、飾物、玩具等本身都不存在吸引靈體的作用，只是收藏者接觸得太多類似事物，會很容易令自己的人生觀變得黑暗而產生負能量，如果長期接觸更會令人容易接觸到黑暗事物，不過都要視乎人本身對靈界的接受力。
私家鬼竇
音樂銀器
一直以來不少外國RockBand都會以魔鬼和邪惡為概念，銀器店店主阿偉：「我喜歡地下音樂，MarilynManson、Slipknot都係最愛，我自己就冇試過因為聽音樂而撞邪，不過知道好多外國異教人士會有不同標誌、儀式，引唔引鬼就不得而知喇。」
（a）ToyHunter（23884677）旺角兆萬中心2樓216-218號舖
（b）ANTICHAIST（23329296）旺角兆萬中心1樓118號舖
（c）PageOne（27782808）
