幾時都話香港人腦筋轉得快，好似近排全城熱爆嘅「巴士阿叔」，講到街知巷聞不特止，發展商仲識得「食住上」，借題發揮大做宣傳。
向來花款多多嘅長實，噚日為集團嘅葵涌新盤雍雅軒做宣傳，搵咗架城巴搞記者會。咪以為售樓處冇位，又或者平時搞記者會嘅酒店俾人Book晒，查實係賣樓經理梁焯鏗，借近期全城最hit嘅「巴士阿叔」做記招場景。
架巴士貼晒熱爆金句「有壓力、未解決」，仲用話劇形式演繹故事，內容話搭緊巴士嘅年輕人就快結婚，為搵樓、籌措資金搞到好大壓力，梁焯鏗就話問題易解決，皆因雍雅軒將會有個「冇壓力」供款計劃，咁就唔使煩。
話劇演繹夠新鮮
長實仲將呢個巴士熱潮用到新聞稿裏面，話市場查詢雍雅軒嘅熱烈程度媲美「巴士阿叔」，係喺徇眾嘅壓力下先提早開賣喎。
將記招嘅題材搞到咁貼市，場地又咁新鮮，腦筋轉慢啲都唔得。之但係，𠵱家息口係咁加，市道又唔太好，究竟買咗樓「有壓力」，定係未買樓「有壓力」，就見仁見智嘞。
電郵地址：[email protected]