普遍人覺得女仔比男仔好，因為有化妝品呢樣偉大發明，個女仔唔靚極，只要執一執，出街都見得吓人，但我就覺得男仔遠比女仔幸福，𠵱家大部份人眼中嘅型男已經唔再需要甚麼天賦條件（除咗矮），唔使青靚白淨、唔使眼大大。呢幾年打開本本日本雜誌，靚仔欠奉，個個都黑黑實實、頭髮蓬鬆、滿面鬍鬚，擺出一副有型有格嘅Pose已經謀殺唔少無知㗎妹。
諗深一層，愈諗愈覺做仔着數，只要識打扮識着衫，不愁無女仔埋身。男仔要打扮吸引，如果話套衫係精髓所在的話，咁個髮型一定係全個外形嘅命脈。要個頭型得嚟合時，崇日係最穩陣方法，今期日本型男就大留長髮，打開7月號《smart》，不同程度嘅鬈直長髮隨書可見。當然港仔模仿都要小心行事，日本㗎仔一舉一動嘅神態一向囂張內斂，留下一把長髮就見Cool味，港男稍一不慎隨時變成癲佬一個。要買今期《smart》嘅另一大原因，最終都係因為一對whizxRebirth沙灘拖，Pattern夠型抵撐，又啱晒時候用，日本買對拖鞋都唔止650日圓啦，仲唔快啲搶？
