內地地產股股價大多在今年4月到頂，之後就有中央政府要對樓市降溫的消息傳出，而內地地產股在過去個多月內，亦已大幅回落，在宏調消息出台之前，跌定先，佢哋回落嘅幅度唔算細，普遍都成30幾巴仙，少數更超過40%。
不過，有1隻例外，就係合生創展（754），佢有跌過，但好快又彈番上去，4月時高價19.90元，5月見19.95元，到前日（6月1日），又創出20元新高，當日收19.15元，噚日收18.95元。
合生只係異類，大圍嚟計，以中國海外（688）嘅反彈力度最強，佢由4月高位6元回落到3.825元，跌幅係36.25%，而由低位反彈，噚日上番4.875元，升幅27.4%。
中海彈力最強
至於與中海同級數的華潤置地（1109），表現就大為遜色，佢由4月高位6.217元（除息計）落到3.75元，跌幅39.7%，而噚日仲掂一掂低位先反彈，高位亦只係4.10元，反彈唔夠10%。
另外1隻較為強勢嘅內地地產股係越秀投資（123），佢因分拆REITs關係，股價在5月先見頂（1.95元），而落到1.28元，跌幅亦有34.3%；近日反彈，噚日重上1.53元，升幅有19.5%。
中央政府已數度推出宏調樓市嘅措施，而由於內地地產股已跌定等宣布，壞消息出台後，反而由低位有不同幅度的回升，照計內地地產股調整已完成，後市可重新向好。
降溫措施影響溫和，大行看法仍然樂觀，摩根大通便表示不會調整內地地產股每股盈利預測，而投資評級亦不會作出改變。高盛更認為內地樓市仍有多項利好因素，包括：(1)貨幣政策寬鬆；(2)實際利率低迷；(3)人民幣滙價偏低；(4)家庭收入增長強勁；同(5)土地供應受限制等，地產發展商長線仍受惠。
中海反彈力強，主要係有大行推介，高盛就認為強大的地產發展商會受惠內地的經濟增長，建議吸納中海。花旗研究報告預測中海06及07年（12月年結）盈利分別為25.39億及34.8億元，按年升1.16倍及37%，維持「買入」評級，目標價6.10元。
郭兆誠