昨日講完有分析員估計中國燃氣（384）業績麻麻，股價因而被質，點知話口未完，隻股停牌話搞收購。但另一隻剛剛話進軍大陸搞燃氣業務的駿新（091），就揀正昨日開車，勁升13.79％，收0.33元，升近52周高位。
經紀陳話，駿新在上月中以0.25元配股後，股價浮浮沉沉咗一段時間，但整體嚟講都叫做向上炒，早排升唔上主要係大戶未收齊貨之故。
不過，幕後炒家作風比較孤寒，勁升一日就回番好多日，悶到跟炒嘅散戶沽番出嚟佢就升，想賺吓快錢一啲唔容易。
駿新昨日成交股數2452萬股，金額760萬銀，雖然比以前活躍咗，但始終唔夠大，維持私人派對格局。
除駿新外，同樣喺上月中配股集資嘅中國星（326），昨亦急升10％，收0.385元，較配股價0.33元升16%。經紀陳話，查實冇咩特別炒作理由，講嚟講去都係話進軍內地博彩業有眉目。
慕容小初