666寓意撒旦，所有人都話666邪爆唔老嚟，總之就避之則吉，偏偏呢個世界就有人唱反調，愛死呢組數字。有明星將666畫上牛仔褲，有富豪唔怕炒車用佢嚟做車牌，有6月6日壽星女大撐666與眾不同，仲有街坊重新解構666嘅真正意思㖭。
記者：曾冠輝
攝影：周旭文
余文樂：6讀起上嚟個音似樂。
余文樂勁鍾意「6」呢個冧巴，貪佢諧音似自己個名：「『6』讀起上嚟個音似『樂』，聽到覺得好有親切感。」鍾意得呢個冧巴，日常生活一定勁用個「6」字，余文樂都唔例外，佢仲一連3個「6」字咁用㖭：「愈多『6』愈好㖭呀，我用親都唔止一個『6』，我車牌用『666』喇，之前4月30號出席Levi's501StayTrue記者會，我都將『666』三個數目字畫上條牛仔褲度，等人一讀起就即刻諗起阿樂。」除車牌同牛仔褲，佢仲爆過料畀記者知自己嘅提款卡密碼都係用多個「6」字組成。
西方人相信666代表魔鬼撒旦，不幸，余文樂用「666」做車牌同提款密碼，驚唔驚先？「我覺得『666』只係電影公司嘅宣傳橋段，無話驚唔驚，如果你信有呢件事，咁呢件事就會存在，我唔會刻意去諗，因為自己好怕鬼神呢回事，愈諗盞自己愈驚。」佢揸車從未發生過怪事，始終呢啲嘢，信則有不信則無。
蔡志明：我唔信邪嘅。
香港玩具大王蔡志明身家豐厚，擁有近30部名貴靚車，由勞斯萊斯到林寶堅尼都有，靚車牌冧巴都有廿幾個，而且個個價值不菲，好似「xx115」車牌就用咗10萬先競投得手，最貴一個車牌係「323」，用咗60萬，「xx666」呢個車牌就平啲，不過都要差不多10萬先投到。我諗大部份人都信邪唔用呢啲冧巴，但蔡志明就無有怕：「車牌號碼睇落順眼就得，數字形狀最緊要同車型夾。好似『xx666』咁，人哋話代表魔鬼之子，我就唔信呢家嘢。」
邱瑞新：666惡魔Q仔回歸。
有睇開《耀武揚威》都一定記得Q仔回歸呢一段故事，話說茜姐一心扶掖Q仔重出江湖，專登揀6月6號下午6點重新戙旗，主編邱瑞新解釋：「『666』一向象徵魔鬼，而『同義會』Q仔選擇喺6月6號6點重出江湖就係寓意惡魔回歸，我就唔特別信邪，可能自己係中國人啩？」
壽星女：6字係屬於我嘅。
「『6』呢個冧巴係屬於我嘅！」阿Q6月6日出世，身為天主教徒嘅佢話：「平日返聖堂都無乜講『666』，自己6月6號出世，都覺得個『6』字代表咗自己，細個玩數字球一定嗌6號，當人人都話『666』邪嘅時候，我反而覺得6月6號比5月5號、4月4號仲特別。」
「收過一份66嘅生日禮物！」阿Mun對「6」字嘅喜愛程度比阿Q仲厲害，佢1983年6月6號生日，試過上網搵一個ICQ冧巴19830606嘅人，求對方轉讓號碼畀佢，可惜對方一直不在線未成事。佢仲收過一份好特別嘅禮物：「有年生日，個同學送咗個裝住66個1983年出產嘅$1硬幣同66粒星星畀我，嗰一刻都幾感動，可惜佢係女仔，如果男仔送一定俾佢冧死。」嘩！要搵到66個1983年出產嘅$1硬幣一啲都唔易，各位男生可以學吓嘢喎。
Roy：愛666因為愛英格蘭。
阿Roy愛足球愛到開「352大本營」波衫舖，佢愛「666」，因為1966年英格蘭唯一一次捧走世界盃：「06年世界盃係英格蘭人腳最齊嘅一屆，如果今年攞唔到冠軍就唔知要再等幾耐。」不過「6」唔係Roy幸運號碼，反而從個「6」字悟出做人道理：「中國人話六六無窮，所以我覺得『6』係個吉祥數字，玩大富翁擲到『6』都可以獎盃1次喇，不過連續擲到3次『6』要返大陸喎，所以有時做人又好做嘢又好，都唔可以去到咁盡，太盡反而害到自己。」有啲道理喎，估唔到從「666」都可以悟出人生哲理。
Devil：貪666夠邪夠奸。
一聽到Devil呢個名就知佢邪，原來Devil好鍾意「666」，買親六合彩都會揀「6」字，唔單止咁，佢仲鍾意埋魔鬼：「我覺得『666』好型，我就貪佢夠邪夠奸，我連英文名都改埋做Devil㗎。『666』代表魔鬼，所以我好鍾骷髏骨，我屋企就有好多骷髏骨飾物。」咁鍾意魔鬼嘅佢同樣鍾情鬼片，仲話會專登揀6月6號去睇《凶兆》㖭。
Viola：想有魔鬼男友。
就算唔係6月6號出世，女仔一樣可以鍾意「666」，Viola鍾意揀多「6」字嘅電話號碼，更希望有個6月6號生日嘅男朋友：「我最想我男朋友係6月6號生日，最好仲係6點出世㖭，夠晒型，我又啱啱係雙子座，好神秘，同佢拍拖應該會幾得意，就算佢係魔鬼我都唔怕。」
粉麵舖老闆：日日都淥淥淥。
鍾意「666」唔係後生仔女專利，廟街粉麵檔新興美食老闆陳生好搞笑咁話：「我點會唔鍾意『666』啫？我日日返工都戙喺度『淥淥淥』㗎喇！淥麵呀！如果無得淥吓淥吓，咁我食乜呀？愈有得淥愈好呀。『666』邪？邪得過無飯開？」
甘生：96663666好記。
為求全面搜括愛「666」人士，我冒昧亂撥多「6」字嘅電話冧巴，撥咗十幾個終於得甘先生回答：「呢個冧巴係朋友送嘅，都用咗好耐囉，一向都無乜邪嘢發生過，一直都幾好，我都鍾意『6』呢個數字，貪個冧巴好記吖嘛！」
