中行（3988）上市前，曾經有位高人話中行上市初期升15-20%，但當時市場波動，加上中行市值大唔容易推得郁，所以阿虎以為呢位仁兄只係一時口痕亂噏，但點知真係畀佢講中。阿虎厚住面皮再向呢位高人虛心請教，佢話只知中資入市撐場，至於背後原因就唔太清楚。
中行噚日最高升至3.50元，差不多到價，好難期望中資會無止境地將中行推高。事實上，無論P/B或PE，中行已經貴過建行（939）與交行（3328）。
中資傳QDII買港股
另外有消息話，內地有資金透過QDII方式開始吸納港股，掃完隻中行，噚日又開始掃內地電訊股，搞到中移動（941）大升4.25%至41.65元，聯通（762）與網通（906）亦分別升3%及3.57%。黑客話，市場傳緊內地就發3G牌，而聯通拆骨一事快將落實，所以有醒目錢入市掃電訊股。若落實發3G牌，電訊商就要大興土木建網，升市照計唔少得電訊設備商，但唔知點解京信通信（2342）冇人吼，股價跌2.17%至2.25元。
嘉華國際（173）噚日大升8.33%至2.60元，而同系的銀河娛樂（027）就跌2.4%至8.10元。主要是因為市場憧憬嘉國會出售手持的6.15億股銀娛畀Harrah等策略投資者。
以銀娛噚日收市價計，呢手股份市值達50億元，相當於嘉國總市值61.9億元的80%。剔除銀河娛樂股權，嘉國市值約12億元，而旗下物業組合約值100億元，減30億元負債，淨值70億元。
換言之，嘉國市值較其資產淨值有約83%大折讓，對於對沖基金而言，絕對是一嚿肥肉。
阿虎