港股好番，恒指升267點，收復前日失地有餘。指數跟住兩隻最重磅股份變化而變化，中移動（941）與滙控（005），總共拉高恒指162點，包咗恒指升幅6成。炒輪三更閉翳四更富貴。例如昨日所提嘅恒指C輪4796與國壽C輪4827，前日一齊急跌19%，昨日則分別急彈31%與26%，報晒仇有凸。
日經指數C輪2125：日經指數嘅波幅，厲害過恒指，高低相差522點，最低跌過237點，埋單反升285點（亦正因為咁，港股下晝裂口高開，升到收市）。日經指數窩輪，當然成架超級過山車咁，最巴閉嘅係2253，收8.2仙，升幅39%，唔係亁郁，有42球轉手，金額超過3球。隻輪9月初夠鐘，溢價8.3%，槓桿率51.9倍（有效15.6倍），引伸波幅20.8%。炒日經指數C輪，正路之選係2125，12月初到期，輪價21.5仙（昨升20%），溢價6.4%，槓桿率19.8倍（有效9.7倍），引伸波幅19.7%。
如果睇淡日股，揀P輪，則向2129埋手。當日股係上落市炒，喺日經指數急跌幾百點之時，低價買C輪2125；喺升幾百點之時，掉轉槍頭造淡，低位買P輪2129。喺跌市中買C輪同喺升市中買P輪，好考膽識，唔係個個得。
中企P輪4842：中企指數（H指）P輪4842昨散17%。H股如果再急升，想造淡，4842最啱。隻輪9月尾夠鐘，輪價17.6仙，溢價5%，槓桿率12.5倍（有效6.4倍），引伸波幅29.9%。
章盛