世界盃就快開鑼，問心嗰句，今屆最令港人振奮嘅唔係有波睇，而係有得賭！咁香港第一莊──馬會講明唔理啲波有幾夜，投注站都響11點半落閘。唔使驚，為咗鼓勵大家合法賭波，幾個流動電話網絡商經已為大家準備好晒五花八門嘅手機網上投注服務，務求做到一個也不能少。去到噚日為止，應該係數碼通憑住「貼士速遞──唔贏唔收錢」領先其他對手少少！
點樣唔贏唔收錢法？數記嘅第二把交椅陳啟龍話，其實每個貼士係要收費30蚊，咁你用咗然後又贏埋嘅話，佢哋就會收你30蚊，但如果不幸啲貼士係流嘅，令到閣下輸波，咁你就唔使畀呢30皮囉！咁會畀啲咩貼士客仔？陳Sir話，個貼士供應商係佢哋精心挑選，戰績非常唔錯，畀出嚟嘅當然唔會係邊個贏邊個輸咁簡單啦！
咁講開又講，數記呢半年尚算進取，拍住多個日本手機商推出唔同嘅手機，但佢哋嘅對家3仔，即將引入日本i-mode嚟香港，佢哋又會點應戰呢？陳sir話未驚過，仲叫大家睇睇除咗日本之外，i-mode有響咩地方咁威水過，再者，唔一定要有i-mode先會成功嘅……果然貫徹數記「寸得起」嘅風格！
傳真︰2623-9278
電郵︰[email protected]