物業專家V先生請食飯，講吓物業管理心得，佢話最近去美國參觀大商場，考察吓人哋點樣管理。當地專家話畀佢聽，商場搵保安護衞睇住商場出口、入口，在場內巡邏，已經係out晒，付出人工而無增值作用。新法係晚上商場閂門之後先至搵幾個保安巡邏，日間就培訓啲保安員轉型為「商場服務員」，向遊客提供商場資料、諮詢，幫助遊人解決突發性問題。物業V嘆一聲話：「喺香港搞轉型，唔係咁易，要用好多時間培訓人才。」萬事起頭難，總要開始嘅，物業V夠魄力推動此事，如果佢仍然喺衙門做，講都冇用啦。
物業V第一份工，就係在房屋署，負責上門收租；收租之時，順便查探戶主情況。物業V話：「嗰陣，我哋每月上門收租，順便東張西望，有一次俾我睇到戶主啲家庭照片，有佢嘅嫁女相片，返到寫字樓，立即翻查住戶紀錄，發覺該戶報稱與女同住，其實個女已經嫁咗，實屬虛報！」自從冇人上屋收租之後，房署其實已失去關於戶主嘅最新情報，與實況有啲脫節。物業V今時今日，觀察力敏銳，一睇就知周圍環境狀況，就係當年上門收租，見得古靈精怪嘅事情太多之故。
未上過門嘅，不知上門之重要。慈善Y話有一次佢哋到基層舊區做家訪，行樓梯上七樓（舊樓冇𨋢），行到索氣。一位「派飯員」健步如飛，將飯菜送上七樓一位老伯度，老伯根本無力落樓梯，有病就要搵救護車，等救護員抬佢落樓，睇完病再孭番佢上去。慈善Y睇到心有不忍，問派飯員：「老伯有無親人㗎，」派飯員話：「佢講到自己一人獨居，冇親友理會佢喎。我派飯畀佢好耐㗎嘞，望吓佢塊面就知道佢妥唔妥，佢亦當咗我係唯一朋友。」慈善Y跟住去衙門開會，官員對佢話：「請派飯員實在嘥錢，其實可以外判，呢啲嘢，人人識做啦！」慈善Y講出嚟，問左丁山點諗。左丁山諗起物業V年輕時上門收租之事，對慈善Y講：「衙門中人，坐在冷氣辦公室，可能怕咗審計署啩？佢哋根本唔了解人與人之關係、人與人之溝通，派飯員好可能係老人家嘅唯一對外希望嚟㗎！」