聖鬥士星矢幾乎每個月都Keep住出玩具搶錢，甚麼黃金聖衣、聖衣神話、青銅篇、冥界篇，要儲齊各系列公仔已經好花心機。今次最新推出聖衣神話系列冥界三巨頭之一的天雄星艾雅高斯，配埋2個髮型畀Fans替換，玩具店又出埋大堆公仔服飾、神壇、寶座等等DIY產品……男人老狗玩星矢，又換髮型又加配飾，搞到好似女仔玩Barbie咁娘娘腔？係呀，玩得投入係咁㗎喇。
記者：陸伊琳 攝影：譚盈傑、林栢鈞
今期新出
艾雅高斯未現真身
最新推出的聖鬥士星矢聖衣神話天雄星艾雅高斯，話晒呢個Character第一次出呢類型玩具，所以好受Fans追捧。天雄星絕對唔係騎呢配角，佢是冥界三巨頭之一，絕技係「神鷲襟翼」及「銀河幻影」，在第五獄與一輝激戰，最終敗於一輝的「鳳翼天翔」之下，呢個公仔特別之處係配多一個頭髮更換，重現冥界動畫中天雄星未現真身時的模樣，十分有創意。
聖鬥士星矢聖衣裝着扭蛋公仔Part2，全套5隻$89（a）
DIY砌場景
「正斗玩具店」老闆阿輝係超級星矢迷，佢間舖亦主攻賣星矢貨品：「隨盒附送嘅原裝服飾披肩，感覺幾馬虎吓，所以索性自己設計搵廠生產，喺自己間舖賣埋呢啲星矢配飾，最好賣係神話系列嘅披肩，因為有幾種顏色選擇。」雖然賣花讚花香，但我都認為DIY披肩確實比原裝披肩更立體細緻，佢仲話：「如果想放喺屋企當景品，不妨畀點心思DIY個場景，例如加一張寶座，咁公仔就會生動起嚟。其實有啲Fans已經昇華到玩多關節素體公仔，佢哋會加個扭蛋公仔頭改裝成星矢公仔，好玩在形態多變。」
其他精品
（a）超人玩具（23662688）
旺角兆萬中心2樓222室
（b）正斗玩具店（23001309）
旺角信和中心1樓117舖
