張文慈、麥家琪同李思蓓等一班劇集《情陷夜中環2》演員，前日趁住葉璇缺席《情2》宣傳，喺沙灘度過一個好融洽嘅晏晝，其間仲加插幾場「單打」賽，成班演員你一句我一句，精采絕倫，張文慈有意無意將葉璇刀仔拮大髀講成自插下體，麥家琪又扮內地人口音話：「唔係五吋長，係唔算長。」旁人一聽就知佢哋笑緊葉璇啦！
責巴士阿叔
以為班姐仔笑完就告一段落，點知呢個刀仔拮大髀嘅笑話仲有下集，噚日亞視安排《女人禁區》探班，嘉賓梁思浩一見葉璇就話：「你做乜專登攞刀插自己？」葉璇聽到之後大發嬌嗔咁話：「黐線、變態、白癡，我儍嘅咩！我點會插自己啊！」然後手舞足蹈咁講述事發經過。
當大家以為葉璇俾張文慈同麥家琪寸完會嬲到震，點知葉璇居然無動於衷，仲話：「我相信佢哋唔會咁做，係一啲立心不良嘅小人挑釁。」不過呢頭話唔信，轉頭問葉璇會唔會嬲，佢話：「我不嬲好大方，唔會嬲佢哋，我冇量度、胸襟，都唔會喺度。」咁即係點啫，葉小姐？
另外，葉璇喺節目入面，聯絡到「巴士阿叔」短片主角之一，巴士口靚仔Elvis嘅媽咪何太，何太形容巴士阿叔（陳乙東）行為反常，葉璇問何太被粗口問候，會唔會原諒呢位阿叔？何太話：「（佢）一把年紀，應該反省。呢啲人污染市容，教壞後生，做壞榜樣，仲以為自己好啱。」
