讀書時迷戀默片，看過關於修復差利、BusterKeaton的紀錄片，令我對這類電影史工作者充滿敬意。幾年前邵氏Remaster翻出經典DVD，馬上奉上銀両，胡金銓固然無得頂，其他都係搞笑多，特別邵氏電影套套都突然彈出一對女人胸脯，勁好笑！最經典係睇《太極拳》，此片由倪匡編劇，傳聞主角陳沃夫乃太極高手，點知煞科後突然暴斃。即刻買來睇啦，一睇之下，全片硬橋硬馬，邊係太極？浪費了我40大洋，一個人中招太寂寞，我馬上把VCD「推介」給習武朋友。
近日翻拍翻唱成災，與其看新《凶兆》、《海神號》，不如看原裝。同事塞我一張邵氏舊片《愛奴》，一看不得了，一個復仇故事竟然寫得又奇情浪漫又武俠、再加妓院、性虐待、女同性戀等元素，主角性格突出，全片少少鹹多多趣，好Cult。72年的楚原叔前衞過王家衞，但大概本片太超越時代，當年唔收得。無天時地利配合，有能力者，亦會瞓直。