貴人出門招風雨，煲呔噚日帶埋一班商家佬出發去廣西，香港即時發出紅雨警告，桂林機場亦因天氣惡劣而影響航機升降，好彩成班闊佬首站係去南寧，當地天氣唔錯，唔係就好掃興。有錢佬親臨考察，當地政府倒履相迎，安排幾十個學生喺機場表演民族舞蹈歡迎代表團。
呢個團成員個個大把身家，但都要忍受趕鴨仔式待遇，一落機就參觀多間大型企業，包括一間由港商投資嘅中藥廠，負責人知道煲呔成日勁咳，即場送咗啲羅漢果止咳茶畀煲呔，好識做。煲呔則話廣西投資環境幾好，美中不足係交通唔算方便，香港每日只有一班機飛廣西，港商往返頻頻撲撲好辛苦。
廣西自治區領導夜晚設宴歡迎香港闊佬團，廣西藏族自治區黨委書記曹伯晨話，港商喺廣西投資金額愈來愈多，佢期望雙方能夠加強合作，曾蔭權則吹水話香港同廣西只係「一水相連」，香港最叻搞金融、物流、旅遊同資訊科技，通通可以為當地企業服務，特別係中藥及會議展覽行業，總之兩地合作日後大把世界。
曾蔭權訪問廣西後，星期日會到雲南昆明出席第三屆泛珠三角合作論壇，繼續招商同泛珠搞好關係。
傳真︰2623-9278
電郵︰[email protected]