一粒小小的雞蛋仔，背後商機無限。被譽為全球「舖王」的銅鑼灣景隆街2號舖位，面積只得20平方呎，每月呎租高達4,500元，令人咋舌的昂貴租金嚇退不少名牌商店，但每日平均賣出400底雞蛋仔的「顧記」卻有能力租下該舖位。
加租至15萬吃不消
老闆顧先生04年租下該舖，當時每月租金只需約六萬元，去年突然加租至九萬多元，升幅超過50%，「好勉強喇，每日起碼要賣200底雞蛋仔（每底10元）先夠交租。我哋兩公婆加埋一個女工，一年365日冇得休息先搵到飯食。」不過，近期業主通知他再加租至每月15萬元，即平均呎租達7,500元，無可奈何之下，他惟有選擇下月中暫時結業，直至在區內覓得新舖位為止，「無可能維到皮，咁細一個地方點租15萬？」
同樣在該條街賣魚蛋、燒賣等小食的「景隆街小食」，老闆之一劉先生以每月八萬元租下該個只得300呎面積的舖位。他透露，每日生意額可多達一萬多元，「好多年輕人、遊客都嚟幫襯。淨係計魚蛋同燒賣，我一日都賣成百斤，仲有煎釀三寶、腸仔一大堆唔同嘅小食，三個老闆、三個夥計全部做到唔停手，年中無休。」原來他之前也是在景隆街街口租用面積較現時大一倍的舖位，但因業主將租金由15萬元加至22萬元，於是遷至上址。
本報記者